Uwa ta kashe ’yarta mai watanni 11 a Binuwai

Ana zargin wata matashiya da kashe ’yarta mai watanni 11 ta hanyar ba ta guba a Karamar Hukumar Logo ta Jihar Binuwai.

Matashiyar ta shiga hannu ne a ranar Asabar a yayin da take kokarin jefar da gawar yarinyar, inda matasa suka damke ta suka mika ta ga ’yan sanda a unguwar Abeda-Mbadyul.

Jami’in yada labaran karamar hukumar Logo, Paul Pevikyaa, ya yi zargin maganin kashe ciyawa matashiyar ta ba wa ’yar tata ta kashe ta.

“Ta ce ta saurayinta ne ya yi mata cikin shege ta haifi ’yar, amma sai ya yi watsi da su, ita ke shan wahalar kula da ’yar, shi ya sa ta ba ta guba ta mutu,” in ji Pevikyaa.

• Dan kwallon kasar Ghana ya rasu ana tsaka da wasa
• Yau Hisbah za ta yi zama da ’yan Kannywood

Mai magana da yawun ’yan sandan Jihar Binuwai, SP Catherine ta tabbatar da faruwar lamarin kuma ta ce rundunar na gudanar da bincike.

Wani mai fada a ji a yankin ya ce a cikin daren Juma’a ne ’yar ta kamu da rashin lafiya, cikin kimanin awa biyu ta ce ga garinku nan.

“Babu wanda ta sanar a cikin makwabta ba, kuma sanin kowane cewa idan abun da ya fi karfin mutum ya same shi a cikin dare, yana neman makwabta su kawo masa dauki, ita kuma ba ta yi hakan ba.