An rufe wasu rumfunan zaɓe bayan kammala kaɗa ƙuri’a a zaɓen ƙananan hukumomin da ke gudana yau Asabar a Jihar Kano.
Daga cikin yankunan da aka kammala kaɗa ƙuri’ar har da Firamaren Gandun Albasa inda akwai aƙalla rumfunan zaɓe 22.
Aminiya ta lura cewa sauran rumfunan zaɓen da ba a kammala kaɗa ƙuri’ar ba akwatunan zaɓe kaɗan ne ba a rufe ba.
Kazalika, wakilinmu ya lura cewa jama’a sun ƙaurace wa zaɓen a wasu rumfunan zaɓen da ke ƙananan hukumomin Tarauni da Nassarawa.
Haka kuma, akwai wata rumfar zaɓe a Ƙaramar Hukumar Nassarawa da har zuwa haɗa wannan rahoton ba a kawo kayayyakin zaɓen ba.
