Rundunar ’Yan Sandan Jihar Kaduna, ta cafke wani mutum da ake zargi da safarar mutane a jihar.
Kakakin rundunar ’yan sandan jihar, ASP Mansir Hassan ne, ya tabbatar wa kamfanin dillancin labarai (NAN), a ranar Lahadi.
- Kungiyar NURTW ta tallafa wa mutane 360 a Kaduna
- Jama’a sun daka wawa kan rumbun abincin gwamnati a Abuja
Hassan ya ce “A ranar 1 ga watan Maris, da misalin karfe 9 na safe ne Misis Jummai Danjuma da wasu mutum biyu sun shigar da kara a yankin Katari da ke Karamar Hukumar Kachia a jihar.
“A ranar 27 ga watan Fabrairu, wanda ake zargin, wanda mazaunin Ankwa ne a Karamar Hukumar Kachia, ya yi safarar matasa biyar daga Katari zuwa Eruku a Jihar Kwara don yin aikatau a wata masana’anta.
“Da isa, wanda ake zargin ya dauki matasan zuwa wata gona a Eruku, inda ya bar su a can ya koma Katari.”
Hassan ya ce daga cikin matasa biyar da aka yi safarar su zuwa Kwara guda uku sun dawo gida wajen iyayensu.
Ya kara da cewa ana ci gaba da kokarin gano inda sauran matasa biyun suka shiga.
Kakakin rundunar ’yan sandan, ya ce za a gurfanar da wanda ake zargin a gaban kotu, bayan sun kammala bincike.
