’Yan bindiga sun tare wasu makiyaya ’yan asalin Jihar Kebbi tare yi musu fashin shanu akalla 2,000 a Jihar Sakkwato.
Makiyayan na hanyarsu ta komawa gida ne ’yan bindigar suke tare su suke kwace musu dabbobi suka kai maboyarsu da ke cikin daji a Jihar Zamfara.
- An kama matashi yana lalata da ‘mahaukaciya’ a Suleja
- Limaman coci da suka halarci bikin kaddamar da Shettima na bogi ne —CAN
Sakataren Kungiyar Makiyaya ta Miyetti Allah na Jihar Kebbi, Abubakar Bello Bandam, ya shaida wa wakilinmu cewa, “Makiyayan sun shaida mana cewa an yi musu fashin shanu sama da 2,000 da sanyin safiyar Laraba, aka kora dabbobin zuwa da cikin dajin Zamfara.
“Makiyayan ’yan asalin Jihar Kebbi ne, amma a kauyen Kuchi na Jihar Sakkwato aka tare su, a hanyarsu ta dawowa daga Borgu, Jihar Neja.”
Abubakar Bello Bandam ya ce ganin maharan dauke da muggan makamai ya sa makiyayan tserewa dole domin tsira da rayuwarsu, suka bar dabbobin nasu.
Daga nan su kuma ’yan bindigar suka yi awon gaba da dabbobin gaba daya zuwa maboyarsu da ke dajin Zamfara.
Ya ce an saba a duk shekara a lokacin rani makiyaya kan kai dabbobinsu kiwo a yankin Borgu sannan su juyo da su gida idan damina ta sauka.
Abubakar ya bayyana cewa ba a samu asarar rai ba a harin, amma kawo yanzu ba a samu cikakken labarin halin da makiyayan suke ciki ba.
Amma ya ce yana da kwarin gwiwa cewa jami’an tsaro za su kwato shanun domin tuni an kai wa ’yan sanda rahoto.
