’Yan bindiga sun kashe mutum daya tare da raunata mutane da dama yayin da suka bude wuta kan mai uwa da wabi a wani filin shakatawa da ke garin Egume a karamar hukumar Dekina ta jihar Kwara.
Rundunar ’yan sandan jihar cikin wata sanarwa mai dauke da sa hannun kakakinta, DSP Williams Aya, ta ce lamarin ya faru ne da misalin karfe 7 da minti 45 na ranar Jumu’a.
- Rasuwar Sarkin Biu rashi ne ga Najeriya – Buhari
- ‘Yadda ’yan bindiga suka kashe dana suka sace iyalina 17’
A sanarwar da DSP Aya ya fitar, ya ce ’yan bindigar sun tsere bayan aikata wannan mummunar ta’asa, yayin da a halin yanzu jami’ai sun bazama wajen nemansu.
Ya ce “mun tarar da wani mutum kwance jina-jina inda aka yi gaggawar kai shi asibiti mafi kusa kuma mahukuntan lafiya suka tabbatar da mutuwarsa.”
A yayin da ba a gano ‘yan uwan mamacin ba, DSP Aya ya ce “mun killace shi a dakin ajiyar gawa domin tantance musabbabin mutuwarsa.”
Cikin nasa jawaban, Kwamishinan ‘yan sandan jihar, Mista Ayuba Ekpeji, ya sha alwashin daukar mataki kan wannan ta’ada yayin da ya ke jaddawa jami’an da su tabbatar maharan sun shiga hannu domin su fuskancin fushin doka.
Ya kuma bai wa al’umma shawara da su rika sa ido kan duk wani motsi da ke gudana cikin zamantakewarsu tare da shigar da rahoton duk wani lamari da ba su yarda da shi ba ga jami’an tsaro.
