An damke wata mata mai shekara 30 kan zargin yin amfani da wuka ta kashe saurayinta a yankin Maraba da ke Jihar Nasarawa.
Kakakin ’yan sandan jihar, DSP Ramhan Nansel, ya ce, matar ta kashe saurayin nata ne bayan fada ya kaure a tsakaninsu.
- Ghana ta koro ’yan Najeriya 16 kan damfara ta intanet
- Matashi ya hallaka mahaifinsa kan amfanin gona
Ya ce, yanzu, “Tana hannu kuma an kwace wukar da ta yi amfani da ita wajen aikata kisan, bisa umarnin Kwamishinan ’Yan Sandan Jihar Nasarawa, Adesina Soyemi.
A cewarsa, sun damke matar ne bayan ta yi danyen aiki a Ungwan Gwari, Karamar Hukumar Karu ta jihar.
“An mika ta ga Babban Sashen Binciken Manyan Laifuka da ke Lafia domin zurfafa bincike sannan a gurfanar da ita a gaban kotu domin zama izina ga wasu,” in ji shi.
