Wata kotu a Jihar Legas ta yanke wa wani barawo hukunci cin sarka na shekara uku a gidan kaso bayan samunsa da laifin satar wayar hannu da kudi da suka kai Naira 450,000.
A ranar Juma’a ce Kotun ta Majistire da ke zamanta a Ikeja, ta yanke wa barawon hukuncin kari a kan tarar kudi ta Naira 150,000 da yanka masa.
- Za a dauke ruwan famfo na kwana 5 a Abuja —Hukuma
- Wanda ake tuhuma da kisa ya bukaci alkalin kotun ya daura aurensa
Alkalin kotun, Mista L. A. Owolabi, ya ce dole ne barawon ya biya adadin kudaden da ya sata tare da biyan kudin wayar da ya dauke kafin fara biyan tarar da aka shata masa.
Owolabi, ya jadadda cewar hukunci zai zama izina ga masu aikata laifi irin nasa.
Tun da farko mai gabatar da kara, Innocent Odugbo, ya bayyana wa kotun cewar barawon ya aikata laifin a ranar 19 ga watan Janairun 2021 a yankin Oshodi na Jihar Legas.
A cewarsa, “barawon ya hada baki da wasu mutane suka damfari wata mata mai suna Precious Asibezim wayarta da ta kai darajar kudi N200,000.
“Sannan suka mata dabara ta tura musu kudi har N450,000 zuwa wani asusun ajiyar banki.
“Bayan matar ta gano sun yi mata ‘sibaran na bayye’ suka yi mata sai ta sanar da ‘yan sanda abin da ya faru.
Aminiya ta ruwaito cewa, ragowar mutanen da suka aikata laifin sun tsere yayin da shi kuma dayan ya shiga hannun jami’an tsaro.
