Rahotanni na cewa wani matashi ya kashe kishiyar uwarsa da tabarya a garin Ihima Obeiba Ebozohu da ke Karamar Hukumar Okehi a Jihar Kogi.
Wani ganau ya shaida wa wakilinmu cewa, matashin mai suna Idris Aminu ya samu nasarar kashe kishiyar mahaifiyarsa a gidansu yayin da take sharar barci a daren ranar Lahadi.
- Amurka ta kakaba haramcin biza kan wadanda suka kawo hargitsi a Zaben 2023
- Isra’ila da Falasdinu sun cimma yarjejeniyar tsagaita wuta
Mazauna yankin sun bayyana cewa tun kwanaki uku da suka gabata matashin ya yi yunkurin kashe matar mai suna Salamotu Aminu da guba amma a wannan karo hakarsa ba ta cimma ruwa ba.
Mai Magana da Yawun ’Yan sandan Jihar Kogi, SP William Aya, ya tabbatar da faruwar lamarin.
SP Aya ya ce an gano taɓaryar da ake zargin matashin ya yi amfani da ita wajen kashe matar da ya boye a dakinsa bayan an tsananta bincike.
Ya ci gaba da cewa, daya daga cikin ’ya’yan matar ne mai suna Ibrahim Aminu ya yi arba da gawar mahaifiyarsa tsamo-tsamo a cikin jini, lamarin da ya sanya nan da nan ya ankarar da mahukunta mafi kusa.
Jami’in ya ce tuni sun cika hannu da wanda ake zargin yayin da bincike zai ci gaba da gudana kuma da zarar an kammala za a mika wa Kuliya lamarin.
