Mamallakin gidan da jam’iyyar PDP take haya a ciki a matsayin sakatariyarta ta Jihar Legas, ya tashe ta daga ciki saboda taurin bashin kudin haya.
Gidan dai na kan titin Adukunle Fajuyi ne a unguwar GRA da ke birnin na Legas.
- Najeriya A Yau: Yadda cutar siga ta hana ni zama soja —Matashi
- A baya na yi wa aure mummunar fahimta — Malala
To sai dai jam’iyyar PDP reshen jihar ta bayyana matakin a matsayin abin takaici saboda ko a kwanan nan, sai da ta biya Naira miliyan takwas daga cikin bashin.
Kakakin jam’iyyar a jihar, Taofik Gani, a cikin wata sanarwa, ya bayyana matakin da mai gidan ya dauka a matsayin abin ban haushi.
A cewarsa, “A iya sanina, na san akwai bukatar mu cika kudin da ake bin mu, a zahirin gaskiya ma, ko a kwanan nan muna shirin biyan wasu, amma ba ni da masaniyar zuwa kotu don a tashe mu.
“Muna fatan wannan ba wani yunkuri ba ne na musguna wa babbar jam’iyyar hamayya a jihar nan ko na tozarta ta.
“Ina da tabbacin an lalata dukkan wasu muhimman takardu ko an dauke su da gangan, don a kawo wa shirye-shiryenmu na 2023 cikas.
“Wannan ba abu ne da za mu lamunta ba, za mu dauki dukkan matakan shari’a da suka dace a kai,” inji sanarwar.
