Kwaramniyar kwakwazo
Kundar kullin kulululun kozo
Girgiza gariyon gogoriyon gizo
Tataburzar turka-turkar toliyar tozo
Burgujejen bujen buzuzu bazo-bazo
An yi mutuwar kasko
A kwakwar kwankwadar koko
Wasu na ta labe-laben loko
Shirmen shantakewar soko
Bilinbituwar bobon bokoko
Aika-aika an auno
Artabun Awon-nono
Bama-baman bindigogin Bararon-nono
Cututtukan cisge cunar cocuno
Rawanin rudanin ranin Rano
Boutrous-Boutrous Ghali
Yai kiran kwantar da hankali
Amma an yi karon kansakali
An gaza masalahar misali
Bambamin balbalin bala’in balli
Kasassabar kisan gilli
Kitmurmurar karon-battar Kigali
Sasarin sa-in-sar Somali
Masu manufa mutanen Mali
A kasar Niyyar-jari Buzu ne Agali
Mu dai yi shirin kiyayar gaba
A kiyayi gaba-da-giba
Kyautata wa juna a saba
Cututtukan baya a tuba
Munana da kyawawa a rarrabe a rarraba
A zo ai wa tufka hanci
A fitar da al’umma kunci
Kowa ya shaki iskar ’yanci
Ba nuna bambanci
Al’umma ne fiffikon muhimmanci
Hattara Haurobiyawa, a kula da kwazazzabon kwakwazon kwata kasassabar Kigali, don haka lallai a hankalta a watsar da munanan kalaman da ake ta jefa wa juna a kowane sashe na kasa. Domin mafi yawan jimurdar jayayyar ja-in-ja kan fara ne wasa-wasa, ganga-ganga, ta yadda da an samu masu gangancin gangan sai kawai su auka wa juna, karshe a karke da artabun arangamar auka wa juna. ‘Baki dai shi ke datsa wuya,’ a cewar Malam mai yaren Hau-hau wajen hawan-sa ba tare da sa-in-sa ba. Kalaman batancin da masu fuka-fukin tashin kowane sashe ke yaba wa juna na nuni da cewa, ‘ba sa bitar kundin labaran da, da na yanzu, ta yadda za su fasko tushen tashin-tashina da yadda za a yi wa tufkar hanci. Manya-manya da kanana kowa ya shiga taitayinsa.’
Manya-manya a daina wasan kasa, don gudun cin kasa. Mu kiyayi kwata kasassabar kisan gillar gillin Kigali; kodayake ana iya kyale ’yan dugwi-dugwi su yi busu-busu a rairai, amma don a tarairayi rai, sai kawai a tsala musu tsumagiya, ko sun shiga taitayinsu.
Lado da Okonko da Lasisi, ku sani ku ne a doron dandamalin dumuiniyar kwaikwayon koyin koyi-ka-koyar a fadin Ifirikiyya, don haka sai ku kiyayi kwankwadar RUWAN RANDUNAN RUNDUNONIN RURUTA RATATTAKAR RAKA-RAKAR RARAKAR RUDANIN RUGURGUZA RUWANDA, inda aka yi HAUTSININ HARGITSEWAR HATSANIYAR HUTUN HUTU, tare da TURNUKUN TARNAKIN TUTSUN TUTSI; kuna dai da masaniyar RUMFAR RUFA-RUFAR RAMUWAR FANSAR Kudancin Ifirikiyya, al’ummar da ta yi fama da wariyar launonin larurar lamunin lumanar al’umma, kuma ta yi yunkurin daukar fansa kan ’yan uwa Ifirikawa na kusa da na nesa da suka rashe a kasarta. Kafin kauwamewar Kagame an yi fama da kai-kawon kansakalin kisan gilla. Uwa-uba, a nan kusa-kusa, makusantan makwabtan mutanen Haurobiya na kasar Niyyar-jari, sun taba tafka ta’asar ARTABUN ARANGAMAR AZANCIN AZBINAWA. Daukacin wadannan al’amura dai sun haifar da dundumin damuwar nunin nauyaya nadamar al’ummar kasashen. Sai mu dauki izina.
Lallai a hada karfin karfen karafa hadakar hannayen hana hautsinin ruruwar wautar watangaririyar wuta ganga-ganga, ta yadda za a kauce wa kowace irin tashin-tashinar tarwatsa tarairayar tarayyar tarin taron asasin asalin al’umma.
Mabiya addinai, lallai a daina ta’adar tattare taro da nai, matukar dai ba hallarar halatta halaliya ba ce, ta yadda za a iya kulla kawancen tantance haramiya. Sannan muhimmin lamirin lamari, shi ne, a daina yi wa juna haushin karnai; a dai yi ta fafutikar susa sosai, musamman wurararen da ke yi wa al’umma kaikai. Kuma a daina takun tafiya lakakai-lakakai. Uwa-uba a kukuta kokarin zaburar zabarin ingarman inganta imani, tare da tabbatar da kyawawan ta’adu su ne ake umarni, sai miyagun ta’adu masu muni su zamto abin hani, don kyautata zamantakewar zaman zamani, har a daina wuni-wuni cikin kowane yammacin yini. Kuma a yunkura wajen shawo kan alhinin aikin hauni a tsakanin turakun turke ma’auratan da ke juya akalar iyalai, har ta kai ga an daina jin amon kashe-kashe marasa dalilai. Lallai akwai bukatar limamai da ladanai muminai, mutane masu tarin aninai su yi ta kira kan muhimmancin ciyar da miskinai koda da tsagin dabinai.
Bisa la’akari da al’amuran da suka wakana a fadin kasar nan, har ta kai ga ana ta yamadidi rawar ranwar katantanwar kewayen kodi da mu a kafafen baza batutuwa, musamman akwakun kwakwazo da jerin jaridu da makalutun makalo makalun mujallu, har ma da likon alakar tsallen badaken mashakatar lilon tsallake-tsallaken hadakar na’urori masu kwanyar kawata kawanya, sai mu ja linzami, mu tsahirta.
Abin yi, mai yiwuwa, da ka iya zame mana kyakkyawar mafita, shi ne, mu yi kunshin kunshewar kundukukin kundinmu na tushe, kada mu yi ta-ware ko ta -warwarayen taratsin tunzurar tarwatsewar kundin-kwance-tushen amon-takun tunkun ambaliyar aman-tekun ruwa tafasashe, har a zo ana ta soshe-soshe, duk fata ta kwaye. Mu yasar da shaguben shaggun shagunan shigo-shigo ba zurfin shiga sharo ba nagge da karsanar furkaniyar fushin fusatar fasahar farfasawa, wai ‘dan halak ka fasa ba.’
Wannan dai, shi ne batu. Saura inji wani ya ce na cika baram-baramar butu-butun buruntun babatu, ni kuwa in yaba wa mutum bantareren barin burbushin buntu, don maganin masu kuntugin kalangunan kidin kutunguilar kulle-kullen kulla kutu-kutun kai-kawon batattun bantare-bantaren batancin bata-garin karairaye-karairayen kanta-karyar karyar kafcecen kantu.
Matukar ana son kawar da tashin-tashinar zaman kashe fatari a tsakanin masu falle fuka-fukin tashi, sai a assasa masana’antu, don shawo kan masu kulla kutu-kutu da ke bai wa bera kafar yin bare-baren buruntun hargowar hargitsa Haurobiyawa, su yi ta bin inna rududu, har a yi musu tunburburin tabarbarewar tabaren huntun hanin hutu.
Idan kuwa muka tabbatar da managartan tsare-tsare, tare da tare tereren tsirfa tsire-tsire, sai mu tsinkayi tsabagen tsayin tsayuwar daka. Kuma da zarar mun yi arba, sai mu kasance muna masu yi wa juna marhaba, tare da kyakkyawar tarba, tunda kasa ta hau bisa doron mafi kyawun turba, inda Haurobiyawa za su hadu da juna suna haba-haba.
A matsayina na babban direban alli a wannan farfajiya ta Dodorido a kan shorido, to na bayar da sautu, abin da ya rage wa masu karatu su yi ta satu, har ta kai ga masu tabin kwanya su tabbatar a kashin kurungunsu sun zautu; mashirmata kuwa su yi ta surutu, tamfar sun zarta kamfanin Dillancin labarai na Reuters, mai laftun labarai rututu
Daga nan sai mu dunguma mu tattaka, mu hau matattakalar takun kai wa gaba, inda ake samar da tsibi-tsibin tsaba, a hana ’ya’yan Inna da Baba ta’adar dabba. Su kuwa magabtan al’umma a yi musu kawanyar zugar zagayen zobba, har ta kai ga nagargarun ayyuka su zamo kowa-da-kowa ya saba. Wannan dai ita ce turbar ci gaba. Don haka Haurobiyawa, mu yi hadin hannayen harhaduwar hayewa, mu yasar da mamungar maye ka da mu sha kaye, har a mamayemu; sai mu kara kaimin hadakar karfin birni da kauyen ’ya’ya da iyaye, mu yi kokarin share hawayen ’yan uwa.
Kashedinmu, ka da mu mayar da tsinkayen hannayen agogo baya. Mu yasar da kwakwazon kwarmaton kwata kassabar karon-battar kisan gillar gillin kutunguilar Kigali. Mu kiyayi kai-kawon kawalniyar karafkiyar kafce-kafcen kansakali. Ka da mu zamto miyagu masu cin zali. Mu binciki tushen asali, kafin kwalkwalin solsale solsali; sai mu yi kokarin kwantar da hankali; a hada kai talaka da mai hali. Mu dai ba ma son jidali, Fullon falalen filin fafutikar fataucin bisashe ma ka da a dawo masa da jangali, mu dai tattara bayanan alkaluma, har mu fitar da jaddawali. Wannan ita ce dabarar warware mummunan kulli kundar kululun kulafucin kullatar janjanin ja-in-jar jigata juna.
Haurobiyawa, hurumin haramar hadakar hada hannayen hadaddu, ita ce, halatta halaliyar hattarar haramarar haramta haramiya. Sannan ka da mu tsaya tsayin tsiwar tsiyataku, har magabtamu su samu kafar yi mana aringizon artabun arangamar giza-gizan girgizar gariyon gogoriyon gorin goriyar isgilancin iskancin ingiza iza wutar wautar mai katutun kantun raurawar rawar ruftawa ruwan tsamin tsimin tsamiyar tsororuwar tsomomuwar tsundumawa tsundum tsamo-tsamo. Lallai wajibimu ne, Haurobiyawa, manya da kananan, kowa-da-kowa, a yunkura, a shawo kan karakainar kwazazzabon kwararon kwarmaton kwaramniyar Kwakwazon kwata kwakyariyar kasassabar kisan gangancin gwagwagwar gwaramar gwalalon gillin gillar Kigali.
