Dan takaran shugaban kasa na jam’iyyar APC, Bola Ahmad Tinubu, ya ce idan ya ci zabe zai tabbatar aikin hako man fetur na garin Kolmani da ke Jihar Gombe bai tsaya ba.
Tinubu ya bayyana hakan ne a lokacin yakin neman zabensa a Jihar Gombe, inda ya ce muddin aka zabe shi gwamnatinsa ba za ta yi kasa a guiwa ba wajen kammala aikin.
- Za mu hukunta duk wanda ya ki karbar tsoffin kudi —Ganduje
- Wainar da za a toya ranar Talata a Gasar Zakarun Turai
“Zan tabbatar gwamnatina ta dora kyawawan ayyuka daga inda Shugaba Muhammad Buhari ya tsaya,” in ji Tunubu.
Tinubu, ya kuma yaba wa gwamna Muhammadu Inuwa Yahaya, na gina gandun masana’antu a garin Dadin Kowa a jihar, wanda zai samar wa dinbim al’umma aikin yi.
A nasa jawabin a filin taron, gwamna Muhammadu Inuwa Yahaya, cewa ya yi APC jam’iyya ce da ta kuduri aniyar ci gaba da dorawa kan ayyukan raya kasa da ta ke gudanarwa don ci gaban jihar da ma Najeriya baki daya.
“Zaben Tinubu da Shettima, zabe ne na ci gaban Najeriya, hakan zai taimaka na kara samar da wasu ayyukan raya kasa,” a cewar gwamnan.
Tinubu na ci gaba da shan alwashin kammala ayyukan da gwamnatin Shugaba Buhari za ta bari ba ta kammala ba.
