Barkanmu da sake saduwa da ku a cikin wannan filin namu na girke-girke. Ko kun taba zama domin yin tunanin irin girkin da ya dace da manyan gobe musamman a wannan lokaci na sanyi? To idan ba a taba yi ba, a kasance tare da mu a shafin girke-girke na jaridar Aminiya a kowane mako domin samun kayatattun girke-girke da za su sanya manyan gobe cin abinci sosai.
Abubuwan da za a bukata
• Kifi
• Karas
• Albasa
• Kabeji
• Ganyen kori
• Magi
• Nikakken masoro
• Attarugu (ga masu bukata)
• Man zaitun
• Citta
Hadi
A samu gasasshen kifi tarwada ko karfasa, a wanke shi sosai a ajiye ya sha iska sannan a bare bawonsa. Sannan a yayyanka shi kanana.
Bayan haka, sai a dora man zaitun a wuta sannan a yayyanka albasa ta dan soyu kadan sannan a zuba ruwa da yankakken kifin da garin nikakken masoro da yankakken ganyen kori da magi da dakakkiyar citta.
Idan kifin ya fara tafasa sai a zuba yankakken kabeji a ciki sannan a jajjaga attarugu a zuba (ga masu cin attarugu).
Sai a jira na tsawon mintuna biyar sannan a sauke hade da romonsa.
Wannan irin farfesun kifin na warkar da murar yara da kuma kare su daga tarin lokutan sanyi. A ci dadi lafiya!
