Fafutikar farautar faske -faske
Fuffukar fuka-fukin fake
Fetsarar fike-fike
Firi-firin faskare feke-feke
Fantamawar fankamar fanke
Janjanin jinjinar jarirai
Janjamin jimamin jan-rai
Jaye-jayen jan birai
Jijjigar takarkarai
Jogane-joganen ja’irai
Gwamna gwarangwam
Gararuma gararam
Gingimeme giririm
Gundumar gudun gangame gam
Gararam gigigim gum
Tsofafin ’yan kwadago
Cikinku gwamnoni aka hango
Sani-atta da wakilan rafkiya an tattago
Kumbiya-kumbiya suke a kango
Sun tura talaka ya kai bango
Kurmushe-kurmushen kurmusu
Samarin-kusu
masu tufka da warwarar musu
’Yanmatan jaba da gafiya na bula asusu
Munin lakabinku na cikin kamusu
Wai dandani haukaci
Kakarin ka-ci-ci-ka-ci-ci
Miyagu masu munafunci
Na jefa jama’a kunci
Wawaye nai musu tumasanci
Zaman kashe fatari
Al’umma na watangaririyar garari
Mai ingarma kan kuturi
Mugu zaune yana fariyar fahari
Al’umma na watangaririyar garari
Ka ji ’yan watanda
Nanuguniya calkako wahanda
Cilkowa tsuntsun watanda
Toyayyar masa a tanda
A tutulo ruwa daga randa
Fatarsa ta ganda
Busasshen kifi na banda
Far-far-da-ganda
Kurararin karsashin karkanda
Kaftun kartar kasar fadin kadada
Da alkalamin sara suke tasu ta’ada
Illarsu tai kama da tada kan adda
Ragargazar romon rabashen ragagada
Sani-atta ya sungumi sanda
Dumuiniyarsa dandinsu ta zarta Uganda
An ce sun ziyarci Ruwanda
Sui ta gada-gadar gudun gada
Talaka na dandana kuda
Manyan kwabo na ta rangada guda
Da harkallar harigidon hada-hada
An ga rawar Saurayin-kirinki
Dan samari marar kirki
Al’umma na ta fafutikar abin girki
Miyagu nai musu kaki
Sun gaza furta uffan da baki
Kasar nan akwai su kowane yanki
Tattalin dukiya sun maishe shi masaki
Sun maishe da kowa musaki
Su kuwa sui dabgen naman awaki
Lamurransu na da ban mamaki
In kai magana a ce ka fiye raki
Ana ganinsu sui ta laftun mangalar jaki
In sun sauke su boye a daki
Wasu su difara muku garin kwaki
Su zo sui ta durfafar darkaki
Fancon fako
Fankon makoko
Fetsarar yin sako
Fafatawar masu yawo da koko
Fashe-fashen kunshin sako
Ku ne dai kuka nace
Tuni su sun dace
Da suka dafe sai suka bace
Dararraku sun kece
Sun barku da ka-ce-na-ce
Wa-ka-ci-ka-tashi
Halin bera ba fashi
Har ma sukar mashi
In za ku tashi ku tashi
Su ga fuskoki ba murmushi
Mu lallasa su sui laushi
Mu gasa su da garwashi
Su ma su dandani haushi
Jikkunansu sui yaushi
Shi ke nan ba bashi
Sai a zo ai sasanci
Miyagu su tuba da iskanci
Talakawa su yasar da shashanci
Mui zaune cikin mutunci
Ba mai yi wa wani batanci
Majalisar dokokin Haurobiya dibge take da tsofaffin gwamna gwarangwam, tun daga zamanin Saurayin-kirinki kama ya zuwa yanzu da Lawallin Ahmadu ke jan ragama. Kuma daukacin ’yan makarantarmu da gama-garin Haurobiyawa na da masaniya kan irin ta’asar da aka tafka a kwanon tasar ta’asar majalisa tun daga zamanin Baba-ojo mai gonakin Ottawa, har zuwa kan Baban-burin-huriyya.
Babban abin dubi a madubin dubarudu a daukacin kadadar Arewatawa da Kudu, shi ne, ko wannan majalisar za ta ci gaba da tadiye Haurobiyawa su rasa inda mahukunta suka dosa. Sannan daidai wannan lokaci da ake ta tataburzar turka-turkar Fancon fincikar ficikar facaka, wai ’yn majalisarmu za su rika karbar rubin fanshon gwamna gwarangwam da daukacin wuraren da suka yi kwadagon laluben kadago, tun suna masu fuka-fukin tashi, har zuwa yanzu da tsufa ya cin musu?
Hakika Haurobiyawa sun koka da Wa-ka-ci-ka-tashin halin bera ba fashi, har ma da sukar mashi. Shi ya sa muke ganin in za ku tashi, ku tashi su ga fuskokinku ba murmushi. Sai a zo ai ta yi wa juna kallon ruduwa da duban hadarin kaji.
Kun ga shi ke nan, sai mu lallasa su su yi laushi, mu gasa su da garwashi; su ma su dandani kudarsu da haushi, har jikkunansu su yi yaushi. Shi ke nan an yi canjaras ba bashi.
Daga nan sai a zo ai sasanci, inda miyagu za su fasko cewa shayi ruwa ne, har su tuba da iskanci. Talakawa a yasar da shashanci
Mu yi zaune cikin mutunci, har ya zamto ba mai yi wa wani batanci, don ta haka ne kawai za a fita daga kunci.
Haurobiyawa, mu yi fafutikar hana fancon fincikar ficikar facaka, inda su gwamna gwarangwam da ke holewa a majalisar dokokin dukan ta-mola da talakawan kasar nan ke carafken cafke lada da la’adar daukacin kwadago da suka yi a kasar nan, na tsawon shekaru.
Lallai Lawallin Ahmadu ka yi wata doka ko garambawul ga wadda ake da ita, kan cewa masu mulkin mulaka’u su daina fancon fincikar ficikar facaka. Domin su ma ta wata sigar suna tatuke lalitar kasa, har su mayar da ita fanko, su yi wa talakawa fanco!
’Yan makaranta dai sanin kowa ne Dano mai alaye da gungun ’ya’yan jam’iyya mai dan boto da sanda jirge ba su da katabus din jirgawa, ballantana su jirkita kasar nan. Baban-burin-huriyya da Usainin-Babajo ku yi amfani da wannan damar, don ganin daukacin al’ummar kasar nan ana damawa da su, tun da yanzu ba sauran wanda zai damalmala musu al’amura. Tsintsiyar laushi da mai kwakwa a fara share wa al’umma jibgin jibar matsalolin da suka yi musu katutu, suke ta kawo wa kasa tarnaki.
