Dan Cristiano Ronaldo da ake kira Ronaldo Junior, ya yi nasarar zura kwallaye hudu a raga a wasansa na farko a kulob din Jubentus na yara da ke Italiya.
Idan za a tuna, a makon jiya ne muka ruwaito yadda dan Ronaldon ya samu nasarar sanya hannu a kulob din Jubentus na yara na ’yan kasa da shekara 9.
A karshen makon jiya ne yaron ya samu nasarar zura kwallaye hudu a raga a wasansa na farko da hakan ya ba magoya bayan kulob din sha’awa da kuma mamaki. Hakan ya nuna akwai alamar yaron zai gaji mahaifinsa Cristiano Ronaldo wajen shahara a fagen kwallon kafa a fadin duniya.
Sai dai Ronaldo wanda shi ma ya canza sheka zuwa kulob din Jubentus na manya a kakar wasa ta bana, kawo yanzu bai samu nasarar zura ko kwallo daya a raga a gasar Serie A ta Italiya ba wacce aka fara kimanin makonni uku da suka gabata.
Masoya kwallon kafa da dama sun yaba wa Ronaldo Junior a bisa kokarin da ya yi na zura kwallaye hudu a raga a wasansa na farko.
