Batun babban Baushe
Barankadamar bugun bisashe
Bini-binin bilinbituwar Bushe-bushe
Birgimar bagararwar Barbushe
Burgar bobon bokokon Bahaushe
Barusar butu-butu
Bace-bacen babatu
Burmar barambaramar buruntu
Bambaramar batattu
Balgatar bantalar buntu
Tutar tuntun tagiyar Tunau
Makarkashiyar makewar Malam Mantau
Kwatance-kwancen kintancen kwantau
Farautar fafutikar fuffukar fintikau
Dogewar danniyar dunun dannau
Fitintinun fitsarar fetsarewa
Furkaniyar fatalin faskewa
Fankamar fafar fandarewa
Firi-firin far-far farin firgicewa
Fi’ilin feleken fantamawa
Daure-dauren daukakkiya
Damarar dirkaniya
Daukar dawainiya
Dagogwaragon doriya
Damfaruwar darsuwar dokin diya
Babban Bakin Ce-ce-ku-cen bututun batutuwan Birtaniyawa da ke birnin Lantsandan, tare da dimbin kafafen siddin sadudar sadar da sakonnin kasar Haurobiya ne suka yi ta kwakwazo da baje dodannin hotuna, masu wuntsila gudi-gudi da suka yi nuni kan yadda aka yi gangamin gamayyar gayya-gayyar gayyatar ganawar gama-garin al’umma don turmutsitsin tarukan Hau-hauwar hasafin harabar Hawan-sa a wuccikewar watannin da suka rare wajen arcewa aguje, musamman a birnin Dabo inda ba a dabo.
A rugungutsimin rugumniyar rumfuna, musamman cincirindon farfajiyar Baturen Hau-hawar Hawan-sa maganganun masana da wakilan masu mulki sun baje batutuwan kan al’amuran da suka shafi al’adu da kasurar harshen harasan Ifirikiyya, har ta kai ga yau an ayyana wata rana da kan zagayo cikin watan ruwan kowace shekara don yin ce-ce-ku-ce kan al’amuran da suka shafi hankoron hauhawar harshen da masu magana da shi a sararin duniyar nan.
Hakika a bana an yi fafutikar falle-fallen falalen filin fi’ilin feleken fadada farfajiyar fadan fadawan fada, inda aka karke da harare-hararen harkallar hargitsa hada-hadar karsashin kilisar karkanda a gada-gadar gargadar gudun gadar jafin jinjinar ja-gaban jigidar juyin jakadiyar jakada.
Madogarar makalutun makalar mare-maren motsa muka-mukin murgude-murguden maganganun moriyar masu mulkin mulaka’u, shi ne laftun likon ligidin lu’u-lu’u da suka yi wa samamen sunkurun sama’u, inda suka wafce allunan ayarin artabun arangamar amarya Aina’u, daidai lokacin da aka shantake ana ta bankaurar burgar baban Ba’u a turnukun nuku-nukun karatun zukun cumuimiyar ragowar rogon rago ruku-ruku a langabun laftu luku-luku, lamarin da ya haifar da shisshigin shegantakar shedancin shammatar shiga shiriritar shigewa shingen shigifar sansanin sunkumar sidin suga.
Sungumemen sunkin sundukin saman soro na ta torokon tunkahon turo toron taro, a wajen ganga-gangar gangamin gayyatar gayyar goriyar goro, inda aka yi haramar halartar hadakar halin hallarar zuga-zugin zugar zabarin zaburar zakalkalewar zangarniyar zarra, don kauce wa gayyar na gayyaro.
Batun babban Baushe akwai barankadamar bugun bisashe da bini-binin bilinbituwar Bushe-bushen birgimar bagararwar Barbushe da burgar bobon bokokon Bahaushe. Sannan ana fama da Barusar butu-butun bacin bace-bacen babatun burmar buruntun barambaramar batattu balgacewar bantalar buntu. Idan kuwa an samu togaciyar takun sakar tutar tuntun tagiyar Tunau, to akwai yiwuwar makarkashiyar makewar Malam Mantau da Kwatance-kwancen kintancen kwantau a farautar fafutikar fuffukar fintikau, inda ake tsuwurwurta durfafar danniyar dunun dannau; ga daure-dauren daukakkiyar daddake daurarrun damarar dirkaniyar daukar dawainiyar dagogwaragon doriyar damfaruwar dari-darin darsuwar dokin diya.
Wasa-wasan warwasawar wadakar wasa-wasa da ya gudana a wajen hau-hawar hasafin harabar Hawan-sa na ranar daren dumuiniyar duniya da aka gudanar da bukukuwa da tarurruka a jam’in jama’ar jami’ar Babbar bukkar bokokon birnin Dabo, an baje makalu fululu da nazarce-nazarcen rukunin raka-rakar rarakar-rarakar rukukin ragamar ruwayar rayuwar bushe-bushen bini-binin bilinbituwar bashin babban Baushe mai kwasar tuwo da miyar tause a gidan gyatuma Ayashe, inda mahalarta tarukan dai suka yi nashe-nashe, har na mujiyarsu ya washe, kuma suka ji tamfar su yi ta tushin tashin tashe. An dai ruwaito yadda ta kaya a daukacin irin wadannan gwalalon gwadaben gamayyar gangamin ganawar gayya-gayyar gayyatar gamayyar al’umma da aka gudanar a fadin kasar nan don tunawa da zagayowar wannan rana mai matukar mamakon muhimmanci.
Gangamin gamayyar gayya-gayyar gayyatar ganawar girmama al’umma na Hau-hawar hasafin harabar Hawan-sa ya gudana a farfajiyar gidan Baturen Hawan-sa, kuma ni ma na samu goriyar gayyata daga Malam Na-kwaciri, amma dai ban taka dandamalin turmutsitsin tururuwar taron ba. Dalilin da kawai ya sanya na bijiro da watsattsaken washin makala kan al’amarin da ya faru a cikin watan ruwa na wannan shekara ta dubu karamin lauje da sili da manuniyar kasa, shi ne, jin yadda aka kambama kambin kai-kawon kallame kalaman karon-battar kwan-gaba, kwan-baya.
Da jin cewa, a farfajiyar gidan Baturen Hawan-sa ta fadada Harabar hasafin hau-hawar harasa, tare da Kalaman kai-kawon karsashin kilisar karsasa kinkimar kaurara kurin kumsar kyautata fahimtar fannoni gwargwadon yadda masana suka yi faskaren farfasa fasaha. Don haka in an ci gurasa aka hada da masa, ga wasa-wasa a kwanon tasa, sai a ji dadi a warwasa. Malam Na-kwaciri dai tuni ya kosa, ya gayyaci mutane masana masu fursa da suka zo su yi susa kafin kowa ya gurgusa, yadda za a samu fasko nuku-nukun magabta a fallasa.
Tsakure-tsakuren tsokacin tsaikon tsirin tsiyatakun da aka cako a bukukuwan bana, ba wani abu ba ne illa dai kawai nuni kan yadda aka jingine aji-ajin Ajamin Ajamawa, aka karke da bilinbituwar bagun burgar bugun bobon bokokon bushashar bushe-busen babban baushen Bahaushe.
Saboda haka matukar ana bukatar fita daga duma dole ne a kara kwazon yi wa magabta kozo, a yi dandanzon tozo bazo-bazo, kuma a rage wasannin karkuzu ba tare da manufa takamaimai ba. Domin ta haka ne kawai kolo da titibiri ’ya’yan Alaramman almajiran Arewatawa za su rikide su zamo manyan malumman masu manufa takamaimai. Kuma idan aka yi musu manhajar maje-haji mara hajijiyar hautsina hanji, sai su hau doron turbar takun zamani, su yi kafada-da-kafada da kwambon bobon bokoko. Daga nan ba za a sake jin duriyar fuffukar fafutikar fafata fadan fadawan fada ba, ballantana tsatsubar tsunburburar tsatsunburun ko kululun kwallon kulunboton kolo. Da zarar an yi mai yiwuwar yakice yarfen yankwanewar yanyawa, to sai a wancakalar da bulkalar balaguron buyagin bakar wuya.
