Bayern Munich ta kammala kulla yarjejeniyar daukar aron mai tsaron bayan Manchester City, Joao Cancelo.
An kammala yarjejeniyar ce a wannan Talatar da ke zaman ranar rufe kasuwar musaya da cefanen ’yan kwallo a Turai.
- Real Madrid za ta gwabza da Barcelona a Copa del Rey
- Bankuna za su ci gaba da karbar tsofaffin kudi bayan cikar wa’adin CBN – Emefiele
Cikin sanarwar da City ta fitar, ta ce Cancelo zai yi zaman aro a kungiyar ta da ke buga gasar BundesLiga zuwa karshen wannan kakar.
Sai dai wasu bayanai na cewa Bayern na da zabin sayen dan wasan a kan farashin fam miliyan 70 idan kakar wasannin ta kare.
Cancelo wanda ya ci wa kasarsa Portugal kwallaye bakwai a haskawa 41, ya isa Munich ne bayan an auna koshin lafiyarsa a ranar Litinin.
Masu sharhi kan harkokin tamaula na ganin cewa zuwan Cancelo zai iya zama barazanar kawo karshen zaman dan wasan bayan kungiyar na Faransa, Benjamin Pavard.
A shekarar 2019 ce Cancelo mai shekaru 28 ya tafi City daga Juventus a kan farashin fam miliyan 65, inda a yanzu yana da kwantaragin zama a kungiyar har zuwa shekarar 2027.
Akwaii yiwuwar Cancelo ya soma wasansa na farko a Bayern yayin karawar da kungiyar za ta yi da Mainz a DFB-Pokal, ko kuma a wasan bakunta na Bundesliga da za ta je Wolfsburg ranar Lahadi.
