Zabarin zaburar Zabarmanci
Azarbabin Azbinanci
Arancin Arawan Arewatawan azanci
Madungurin Alan-gubron Barbarci
Fafutikar Fullon Fulatanci
Wautar watangaririyar wawanci
Walwalin waliyon walankeluwar wakilci
Wasan wilkitawar wullanci
Wa-ka-ci-ka-tashin wuccikewar wafci
Waskiyar wuru-wurun waken cici
Baje hajar acici
Fafutikar falke fatauci
Sakar masakin sassake kaskanci
Dinkin fatun faden dukanci
Kashe-kashen kashin kayan kasuwanci
A yasar da ganganci
Jimirin jinkirin jinbirin ci
Jama’a ga abin sha da abin ci
’Yan uwantaka ne kulla zumunci
Jan ragamar al’umma ne shugabanci
Mui wa kawunanmu adalci
Mui sassauci
Mui ’yan uwantakar karimci
Mu goge wa tafuka kaushi da kirci
Mu zam masu bai wa magabata tukuici
Kimiyya ke ci
Kere-keren kai ga gaci
Sadarwar zamanin kulla kusanci
Likon alakar likitanci
Zabarin zungurun zawarci
Fafutikar faskaren fannonin fasko fahimtar fasali-fasalin fara’ar fararen furanni, wadanda ke haifar da farin cikin far-far din farin fuskoki, lamari ne dibge da dimbin wahalhalu a fadin Ifrikiyya, musamman ma ganin yadda bakaken Turawa ke turmutsutsun turereniyar tunkude Turawan asali, wajen dankwafar da harsunan mu’amalarsu na asali. Harsunan hada-hadar hobbasan hoccaben Haurobiyawa a kowane sassa da ake gudanar da harkoki ba tare da wasa ba, domin a yaren Hau-hau wajen hauhawar hawan-sa, ana ta hakilon maganganu babu sa-in-sa.
Haurobiyawa, matukar muka yi ta dankwafar da harsunanmu na kasa, tabbas za mu karke da bararajewar baza bezar buzuzun bugun bagun burgar buguzum, har mu rasa ina ma aka dosa. Domin wasa-wasa har mu cinye modar gasa a wajen kassara darussan Hau-hawar hawan-sa, a wajen cumuimiyar cacumar cin gurasa gami da masa ga wasa-wasa a zuba a kwanon tasa, ’yan kasa su warwasa, amma ban da dira wasoso a kwanon tasa, ballantan su yi ta tafka ta’asa.
Babbar bukkar bokokon birnin dabo tuni aka kammala faskaren ma’anonin fannonin sasarin kiraren lissafi da kimiyyar lissafin kere-keren fiziya da ta sarrafa sinadarai. Kuma ina ma jin cewa akwai wadanda suka yi hobbasa wajen baje batutuwan da ke kunshe a kundayen bayanan kimiyyar halittu.
Idan har Jam’in jama’ar jami’o’in Haurobiya za su himmatu ka’in da na’in wajen zayyana dabarun fannonin ilimi a harsunanmu na kasa, to babu yadda za a yi mu yi ta cin kasa a hada-hadar harkokin duniya. Idan kuwa har muna son kwata bajintar birnin Beijing, wajibi ne mu yi birgimar bangaje baragurbin bobon bokoko.
Sannan akwai bukatar shugabannin al’umma su yasar da Wautar watangaririyar wawanci da Walwalin waliyon walankeluwar wakilci a wasan wilkitawar wullancin wa-ka-ci-ka-tashin wuccikewar waskiyar wafce wafcen wuru-wurun waken cika cabin cici.
Dole ne mu yunkura wajen hana nawar Nomau na manomi da ke lakakin tankiyar tanke tanka tamau, don ganin an samu cin dunun dannau da kanne na-mujiyar Kannau a wajen lakumar lunkume lomar lunkumau.
Wani abin fariyar faharin furkaniyar firgici, shi ne, shafukan sadarwar zumun zumuntar zamunnan zamani, wadanda suka hado da Fuskantar bokoko da tukin tuwon titi da watso-zuffa ai suna baje batutuwa cikin harshen Hau-hawar hawan-sa ba tare da sa-in-sa ba, amma duk da haka Haurobiyawa, musamman Arewatawan kasar nan sun wancakalar da harshensu na asali, suna ta tsula tsiyataku tuli-tuli, har ta kai suna ganin ai dan baya ga dangi ne ke kidan gangi ganga-ganga wajen turjiyar kin biyayya ga Baturiya.
Tun da kuwa haka lamarin ya kasance, ai babu ko tantama, an yi mana kawanyar mamayar makirci, inda muke ta mamungar mahaukaci da Inda-indar Isgilanci, ana ta takun tolatsewar tumasanci da Jimurdar jimamin jin jikin jakkanci. Saboda kawai mun shige cikin sansanin sunkurun sasarin sokwanci, muna ta shesshekar shashanci a sha’anin sha’awar sakarcin shamuwar Somaliya mai shu’umanci da Shanshanin shammatar Ifrikanci. Wasu ma sun karke da gantsarar gundumar gaulanci a dallakin dolancin carin carkin carar ci-mu-ci da caccakar cakwaikwaiwar cuci a kakarin ka-cici-ka-ci-ci
Uwa-uba akwai masu luggar logar Li’irabin Larabcin Larabawa da masu kwaikwayon Indira Gandin Indiyanci da Furkaniyar farashin Faranshin Faransanci, inda aka doge da torokon togaciyar Turanci, duk da cewa Hau-hawar hawan-sa babu kaskanci. Ga masu jajircewar juyin Jamusanci daure da janjamin jaruman Japananci na ta mandakon motsa muka-mukin maganar Mandarin a sunkurun Sinanci, har ma da masu murgude-murguden Amurkanci a Ingilishin Ingausar ingarman inganci. Ko ta yaya za a kauce wa kukutawar kuntatar kunci?
’Yan makaranta kuwa an bar ku kuna ta zabarin zaburar Zabarmanci a azarbabin Azbinanci da Arancin Arawan Arewatawan azanci. Tabbas akwai tabbacin samun masu madungurin Alan-gubron Barbarci da
Fafutikar Fullon Fulatanci.
Masu koyon watsattsake da falle shafukan mujallu da makalu da wagagen littattafai a farfajiyar makarantar Dodorido da ke cikin Amintacciyar jaridar kasar Haurobiya, mu yi bita da kwance kulli, don gudun ka da a yi mata bita-da-kulli wajen kassara kasa, musamman a yankinmu na masu magana da yaren hau-hau wajen hawan-sa ba tare da sa-in-sa ba.
Muna iya yara yare yar-yar, musamman ma al’amarin da ke da nasaba da Logar Luggar Li’irabin Larabcin Larabawa ko ta’ammali da Indiyawan Indira Gandin Indiyanci, har ma da furkaniyar farashin Faranshin Faransanci da torokon togaciyar Turanci, ta yadda Hau-hawar hawan-sa ba tare da sa-in-sa ba, zai kasance ba kaskanci.
Wani hanzari dai ba rarewa a guje cikin firgici ba, mu yi la’akari da yadda ake kimanta bobo da kwambon bokokon mutum gwargwadon kwanarensa/ta wajen murguda baki da kanga gilashi a yi ta yaren ingilishi yayin da aka taje gashi, har a tsagalgale, a iya tsigarewar rashin ganin kowa da gashi; ana iya samun wasu kwararrun suna bankar buki, suna ta bushi. Ba illa ba ce ganin mutum ya iya kalallame kalamai a wasu manyan harsunan duniya, amma yana da matukar alfanu ya kimanta darajar kalaman harsunanmu na gado a kasarmu ta gado, kamar yadda wasu tsuntsayen lambu suka yi kuka mai salon rera waka da aka yi mata warwarar tufkar isar da sako kamar haka:
Mu tsuntsayen lambu ne
Haurobiya ce kasar mu
Ku furta hakan ya ku ’yan uwanmu
Sai mu yi limbu-limbu a cikin lambu, inda za mu fantsama wajen gyaran gararumar garkar gayauna don wadata kasa da kayan dundume kururu, ka da tabahuwa ta sanya na-mujiyarmu ya yi kuru-kuru, har mu zo mu yi zuru-zuru. Domin mummunan yanayi ke haifar da ganin zaratan managartan al’umma sun fara kai farmaki da fafutika irin ta tuzurun muzuru. Lallai a shawo kan kangararrun kadangaru fandararru masu huda mana garu. A baje duk wasu dabarbarun rayuwa ba tare da daburcewa cikin kammalallun kalaman harshen da al’umma ke iya fasko inda aka dosa.
Dalibai ka da a nunke ku a baibai, wai saboda laluben matsabbai ko kukutawar kwkume kwabbai. Kowa ya samu manufa takamaimai, musamman yadda za a ruika faskaren ma’anonin fannonin ilimin malamai, a yi ta bibiya da maimai, har masu yaren Hau-hau wajen hawan sa ba tare da sa-in-sa su fasalta, su karkasa kowa ya samu abin matsa muka-muki camamar cumuimiyar taliyar Indon-mami.
Lallai mu rage gardamar gardin garada, mu yi watsi da kulunboton kwallon kollo, ta yadda za mu samar wa kawunanmu mafita mai fasali da salo-salo, har a yi ta baza batutuwanmu a kurtun magana na halo alalo, mai siddabarun dabara salo-salo, wanda da zarar likon alakar sadarwa ya yanke sai ku ji ana ta furta jalli-jogar janjalo, wadanda ke kan layin gwalo su shige cikin gwalalo su rika yi wa jama’a gwalo, suna ta halo alalao, wai siddabarun dabara salo-salo. Wannan dabarar ce kawai za ta iya sauya barankadamar bankaurar bararrajewar baza bezar buzuzun bugun burgar bagu, har ta rikide zuwa babbar banga-bangar bunkasar bajintar birnin Bejeing.
