Hukumar Kula da Ruwan Sha ta Abuja ta ce za ta toshe wasu hanyoyin ruwa famfo na tsawon kwana biyar domin gudanar da wasu gyare-gyare a matatar ruwa.
Sanarwar da hukumar ta fitar ta ce bayan toshe hanyar ruwan, za a hada bututun ruwa na bayan gari da babban bututun ruwa na Kubwa wanda zai yi sanadiyyar dauke ruwan famfo na tsawon kwanaki.
- Ba a taba shugaba mai farin jini kamar Buhari ba a Najeriya —Adesina
- Ruwan leda ya yi tashin gwauron zabo a Abuja
Aikin bututun ruwan da za a gudanar cikin kwana biyar a mako mai zuwa zai gudana ne a ranar Litinin da Talata 18 da 19 sai kuma ranar Juma’a 22 zuwa Lahadi 24 ga watan Oktoba da muke ciki.
Hukumar ta bukaci mazauna yankunan da aikin zai shafa su kasance cikin shiri sannan su tanadai abubuwan da suke bukata na tsaon kwanakin da za a yi aikin.
Unguwannin da abin zai shafa su ne Maitama, Asokoro, Garki 1 Garki 2, sai kuma Wuse 1 da Wuse 2.
Sauran sun hada da Karu, Nyanya, Kubwa 1, Kubwa 2, Barikin Sojoji da kuma Kwaryar Birnin Abuja, wato Central Area.
