Jinkirin isar kayan zaɓe da ma’aikata ya haifar da tsaiko a zaɓen ƙananan hukumomin Jihar Kaduna da ke gudana a ranar Asabar.
An shirya fara zaɓen ne da misalin ƙarfe 8 na safe, amma har bayan ƙarfe 10 na safe, ba a fara kaɗa ƙuri’a ba a mafi yawan rumfunan zabe.
- Tarihin sarautar Dan-Isa a Masarautar Zazzau
- Dan ƙabilar Ibo ya zama Limamin Babban Masallacin Abuja
Wakilinmu da ya ziyarci wurare da dama a unguwannin Tudun Wada Badiko da Magajin Gari da Unguwar Sarki, inda ya lura cewa ba a kai kayan zaɓe zuwa rumfunan zaɓe ba.
An tsara fara yin rijista da kaɗa kuri’a da misalin ƙarfe 8:30 na safe kuma a kammala da ƙarfe 2 na rana.
Tsohon Kansila na Unguwar Sarki, Zubairu Shan’una, ya ce, “Har yanzu muna nan muna jiran kayan zaɓe su iso.
“Kamar yadda ka sani, zaɓen ya kamata ya fara da ƙarfe 8:30 na safe, amma har ƙarfe 10 na safe kayan zaɓe ba su iso Unguwar Sarki ba,” in ji shi.
Malam Idris, wakilin jam’iyya a rumfar zaɓe ta Makarantar Sakandare ta Maimuna Gwarzo da ke Tudun Wada, ya ce ya isa wajen zaɓen da misalin ƙarfe 6:30 na safe.
Amma a cewarsa ma’aikatan zaɓen ba su isa wajen ba, kuma ba a raba kayan zaɓe ba.
A Magajin Gari, an samu rikici yayin da wakilan jam’iyyu suka yi ƙorafin samun jinkirin rabon kayan zaɓe.
