Wata yarinya mai shekaru 13 kacal a duniya, ta zargi mahaifinta, Kazeem Olapade da yi mata fyade a yankin Ido-Osun na Karamar Hukumar Egbedore a Jihar Osun.
Jami’in hulda da al’umma na rundunar ’yan sandan Jihar, Yemisi Opalola ne ya sanar da hakan yayin zantawa da Aminiya ranar Asabar a birnin Osogbo.
- An cafke limamin da yake ikirarin Annabta da baiwar tayar da matattu
- Hukuncin kisa zai tabbata a kan masu satar mutane — Lalong
- Gwamnatin Kaduna ta sanar da ranar sake bude makarantun sakandiren jihar
Mista Yemisi ya bayar tabbacin cewa za a gudanar da bincike mai zurfi a kan lamarin.
Yarinyar ta bayyana cewa mutuwar auren da ke tsakanin iyayenta ya sanya take zama gida daya tare da mahaifinta.
Ta ce mahaifin nata ya yi mata barazana a kan kada ta labartawa kowa abin da ya faru amma daga bisani ta yanke shawarar fada wa mahaifiyarta halin da take ciki.
A cewarta, “Mahaifina ya rufe min baki da matashin kai yayin da yake yi min fyade kuma bayan ya gama na tsinci kaina cikin jini sannan ya yi min barazana a kan kada na kuskura na fada wa kowa.”
Yarinyar ta ce mahaifin nata wanzami ne amma daga baya ya koma makidin ganga kuma a yanzu haka yana da gidaje hudu a Osogbo, babban birnin Jihar.
Sai dai yarinyar wacce ’yar aji daya ce a makarantar sakandire bata fayyace lokacin da wannan lamari ya faru ba.
Aminiya ta ruwaito cewa a karon farko an shigar da korafin wannan lamari ga hukumar tsaron cikin gida ta hanyar wata kungiya mai zaman kanta, inda daga bisani aka mika lamarin a hannun hukumar ’yan sanda.
