Wasu ’yan bingida da ake zargin masu garkuwa da mutane ne sun sace Rabaran Matthew Dajo, na Cocin Katolika ta St. Anthony a kauyen Yangoji a Abuja.
Wani mazaunin yankin mai suna Saleh, ya ce ’yan bingidar sun shiga gidan Rabaran din ne da misalin karfe 9:47 na dare a ranar Lahadi, suka tafi da shi.
- Matsalar tsaro: Yadda fasinjoji suka kauracewa hanyar Kaduna zuwa Abuja
- Masu garkuwa da ’yan uwa 5 a Abuja sun bukaci N30m
“A zahiri mutane sun firgita sakamakon harbin bindiga da suka rika yi.
“Babu wanda ya samu damar fitowa kuma wasu daga cikinsu sun kewaye gidan, wasu kuma suka haura katangar gidan”, inji Saleh.
A cewarsa, ’yan bindigar sun yi ta harbi sama da nufin razana mutane, daga bisani suka yi awon gaba shi zuwa cikin daji.
Lokacin da aka tuntubi Kakakin Rundunar ’Yan sandan Abuja, ASP Maryam Yusuf, ta tabbatar da yin garkuwa da limamin cocin.
A cikin wani jawabi, jami’ar ta ce tuni Kwamishinan ’Yan Sandan Birnin Tarayya Bala Ciroma, ya kafa tawagar da za su bi sahun masu garkuwar don cafke su.
