Wani harin da ’yan bindiga suka kai wasu yankuna biyu da ke kudancin Jihar kwara a karshen mako ya yi sanadiyyar sace akalla mutum 30.
Rahotanni sun ce daga cikin wadanda lamarin ya ritsa da su har da wani Fasto da matarsa da kuma wasu matafiya mutum uku da har yanzu suke hannun masu garkuwar.
- An kona fasinja a cikin mota a tarzomar IPOB
- Zanga-zangar neman Secondus ya sauka daga shugabancin PDP ta barke a Abuja
A hare-haren guda biyu, ’yan bindigar sun tsare wata mota kirar Sienna wacce ke dauke da fasinjoji guda bakwai a kan babbar hanyar Oke zuwa Onigbin da ke Jihar.
Kazalika, daya harin kuma an kai shi ne a kan wata motar haya kirar Hayis da ke dauke da fasinjoji 21, a daidai wurin da suka tare motar Faston a kan hanyar Eke zuwa Maje, dukkansu a Kudancin Jihar ta Kwara.
Aminiya ta gano cewa ’yan sanda sun sami nasarar ceto mutum hudu daga cikin bakwai din da aka kama a cikin motar Siennan, ko da yake ’yan bindigar sun tsere da ragowar fasinjoji ukun da suka sace.
Bugu da kari, ’yan sanda sun kuma ceto kusan mutane 20 da aka sace a cikin wata motar haya ta Hayis ba tare sun ji ko da kwarzane ba.
’Yan bindigar da suka tsare motar ta Sienna wacce ke dauke da fasinjoji daga jihar Ekiti sun gudu da mutum bakwai da ke cikinta zuwa cikin daji.
Haka kuma, masu garkuwar sun sace motar Faston da kuma motar Hayis bayan su shuna musu bindiga a kan hanyar Ekan zuwa Maje.
Har yanzu dai ba a sami cikakkun bayanai kan ko masu garkuwar sun tuntubi iyalan wadanda suka kama da nufin neman kudin fansa ko kuma a’a ba.
Kakakin ’yan sanda Jihar ta Kwara, Ajayi Okasanmi ya tabbatar sace-sacen guda uku a daren Lahadi, inda ya ce tuni ma suka kama wasu mutane da ake zargi da hannu a ciki.
Ya kuma ce jami’ansu sun tsananta sintiri a dukkan fadin Jihar.
