Gwamnatin Tarayya ta gayyaci shugabannin ƙungiyoyin ƙwadago na NLC da TUC wata ganawar sirri a Abuja, kan yajin aikin da suka tsunduma.
Ganawar wadda ke gudana a yanzu, ta haɗa da shugaban NLC, Joe Ajaero da takwaransa na TUC, Festus Osifo.
- Ban taɓa tsammanin zan kai wata guda a matsayin gwamna ba — Fubara
- NLC na neman durƙusar da arziƙin Najeriya — Fadar Shugaban Ƙasa
A ɓangaren gwamnati akwai sakataren gwamnatin tarayya, George Akume; ministan yaɗa labarai, Mohammed Idris Malagi; ministan ƙwadago, Nkiruka Onyejeocha; da sauransu.
Al’amuran yau da kullum da suka shafi harka filin jirgin sama, jami’o’i, asibitoci da wutar lantarki sun durƙushe bayan da ƙungiyoyin suka shiga yajin aikin a ranar Litinin.
Idan ba a manta ba, Gwamnatin Tarayya, ta amince da Naira 60,000 a matsayin mafi ƙarancin albashin, sai dai NLC ta yi fatali da wannan buƙatar.
NLC ta fusata ne bayan ƙoƙarin tatatunawa da Gwamnatin Tarayya domin cimma yarjejeniya dangane da mafi ƙarancin albashin ya gagara, ganin yadda gwamnatin ta dage kan cewar Naira 60,000 kawai za ta iya biya.
Amma a wani martani da Gwamnatin Tarayya ta yi ta hannun mai magana da yawun shugaban ƙasa, Ajuri Ngelale, ya ce buƙatar ta NLC da TUC ba za ta yi komai ba face kassara tattalin arziƙin ƙasar nan.
Ngelale, ya ce matuƙar gwamnati za ta biyewa buƙatar ƙungiyoyin ƙwadagon, tabbas wasu daga cikin kamfanoni masu zaman kansu za su rufe, abin da zai zamarwa ƙasar nan matsala a maimakon samun ci gaba.
Ya ce ko a yanzu Najeriya na fama da tsadar kayan abinci da sauran kayan buƙata, kuma babu makawa wannan lamarin zai ƙaru matuƙar aka yi ƙarin albashin da ƙungiyar ƙwadago ke buƙata.
