Dakarun Operation Hadin Kai (OPHK) sun hallaka ’yan ta’addan Boko Haram da daman gaske a wata arangama da suka yi a yankin Ngowom da ke Karamar Hukumar Mafa ta Jihar Borno.
Majiyarmu ta tsaro ta ce an kashe ’yan ta’addan ne a yayin da suke tafiya da ayarin motocinsu wasu kuma a kan babura kimanin 20 daga yankin Arewacin jihar zuwa yankin Mafa, za su je Dajin Sambisa.
- An kashe kasurgumin dan bindiga Madaki Mansur da wasu 11 a Bauchi
- ’Yan daba sun jikkata mutum 17 a ayarin A.A Zaura
Wata majiyar leken asiri ta ce sojojin sun ragargaje su ne bayan samun sahihan bayanan sirri na cewa ’yan ta’addan na tafiya a mashigin Mafa.
Dakarun tare da hadin gwiwar mayakan sa kai na Civilian Joint Task Force sun yi wa ’yan ta’adda kwanton bauna, suka kashe da yawa daga cikinsu.
Wani kwararre a fannin yaki da tada kayar baya a yankin tafkin Chadi, Zagazola Makama, ya ce sojojin sun kama wani dan ta’adda da ransa, yayin da wasu suka gudu da harbin bindiga a jikinsu.
Ya ce wasu jami’an CJTF guda biyu sun samu raunuka yayin wata musayar wuta da aka yi da su, inda da aka kwato makamai da babura daga hannun ’yan ta’addan.
