Dan Majalisar Dokokin Jihar Kaduna, Ridwanu Aminu Gadagau mai wakiltar Mazabar Giwa a jihar, na daga cikin mutanen da ’yan bindiga suka kashe a hanyar Kaduna zuwa Zariya a daren ranar Litinin.
Aminiya ta gano yadda aka gano gawar dan majalisar daga cikin gawarwakin mutanen da ’yan bindigar suka kashe a ranar Laraba.
- Matasa sun yi fada da ’yan Hisbah a wurin kwacen giya a Kano
- Daga Laraba: Illolin da rashin kaunar juna ke yi wa mata
Shugaban Majalisar Dokokin Jihar, Yusuf Ibrahim Zailani ya tabbatar da rasuwar dan majalisar ta wata sanarwa da hadiminsa kan kafafen watsa labarai, Ibrahim Dahiru Danfulani, ya fitar.
Ya ce, “Muna cikin kaduwa da tashin hankali. A wannan lokaci muna mika ta’aziyyarmu ga iyalan Gadagau, matashin dan majalisa mai burin kawo sauyi a majalisa a yankinsa da ma Najeriya. Za mu yi rashin ci gaban da ya ke kawo mana.”
Kakakin majalisar ya jajantawa iyalan dan majalisar tare da iyalan sauran sauran wadanda harin ya rutsa da su.
Kafin rasuwarsa, Gadagau shi ne Shugaban Kwamitin Kananan Hukumomi a majalisar dokokin jihar.
