Matasa sun kama wasu mutum biyar da ke yi wa wata yarinya ‘yar shekara 10 fyade, ciki har da mijin yayarta, a Karamar Hukumar Igabi ta jihar Kaduna.
Mijin yayar yarinyar ya fara yi mata fayde ne bayan surukarsa ta kai masa karar ta, inji Hajiya Rabi Salisu ta gidauniyar Arida Foundation, wadda yanzu take kulawa da yarinyar.
Hajiya Rabi ta a cikin wani bidiyo ta ce, “Yarinyar ta fara kai kara ne lokacin da ta fara ganin jini a cikin fitsarinta, inda mahaifiyarta ta gargadi mijin yayar da ya fita daga sabgarta.
“To da yake ta ci gaba da talla, a nan ne ta hadu da wani mai sana’ar sayar da gwanjo a kasuwa da ya sayo mata sabon takalmin makaranta, ya kuma yi amfani da damar wajen yin lalata da ita.
“Daga bisani kuma wani mai gidan biredi ya bi sahu bayan ya sayi shinkafar da take sayarwa. Akalla dai kimanin mutum biyar ne suka yi mata fyaden”, inji ta.
Ta shaida wa wakilanmu cewa yanzu haka yarinyar na nan tana samun kulawa daga cututtuka masu yaduwa saboda raunukan da ta samu a al’aurarta.
Ta kuma ce tuni ‘yan sanda suka cika hannu da mutum hudu daga cikin mutane biyar din.
Hajiya Rabi ta kara da cewa, “Yanzu haka ba mu san inda mahaifiyarta take ba, mahifinta kuma nakasashshe ne, ba inda zai iya zuwa.
“Ya kuma damka ragamar kwato mata ‘yancinta da kuma kula da karatunta.
Kakakin Rundunar ‘Yan Sanda ta Jihar Kaduna, ASP Mohammed Jalige ya ce suna da kwararan hujjoji a kan akalla mutum biyu daga cikin wadanda ake zargin saboda sun riga sun amsa laifukansu.
ASP Jalige ya ce, ragowar mutum biyun har yanzu ba su kai ga amsa laifinsu ba, amma muna ci gaba da bincike a kai.
