Tuntun tagiyar Tunau
kasurar kosau
Kurarin kwarwar Korau
Make-maken Makau
Salallamin Sallau
Tamke tanka tamau
Kinkimar kwarin kibau
Mikakken mashin Misau
Tuttudo na-mujiya da tabarau
Bankwarewar barewar Barau
Kayan karau
Kame-kamen Kumayau
Karambanin kambamau
Gumurzun Gwmana el-Rusau
Rarume-rarumen Runtumau
Jaye-jayen Jatau
Matashiyar Malam Mantau
Kumburin karambau
Sankarewar sankarau
Janjamin uwar jiki kalau
Jimurau
Abokin Barau
dundume tumbin kumburau
Taunar gyada marau-marau
Gwale na-mujiya garau
Damben danniyar Dannau
Suddabarun sagewar Sagau
Sullutun sakarcin Shashatau
Sagaraftun sunkurun sungumau
Mulkin mulaka’un Makasau
Azargagiyar zargau
Zanzarewar Zarau
Mai tseren fintinkau
Jiya da yau
Malam ya cilla kibau
Masu ra’ayin rikau
Gurguzun gazawar gezau
Kwamunisancin kwansau
Jari-hujjar hajijiyau
Fahimtar fankan-fayau
Gungumen gingimen ginsau
Gangaren gagarau
Gararambar ganau
Gantsare-gantsaren gantsarau
Gingimarin gangarau
Wasan kwaikwayo
Gogen Garba Liyo
Malam koyi ka kara koyo
Batutuwa ne aka liliyo
In an ga wuya sai a mazayo
Ni dai na tafi in tambayo
Masu bita a bibiyo
’Yan wanki a daurayo
Masu zirga-zirga a zagayo
Kogin fundun-fundun ai iyo
Lallai a waiwayo
Akuya kar ki tunkuyi kwikuiyo
Rairayi aka rairayo
‘Baagadoji’ indar kewano ta kewayo
‘Bago’ babu ‘biri’ a tsinkayo
‘Shigifar ga’ na yoyo
Marka-marka ya tsiyayo
Gulbi ne ya antayo
Goriba aka gwagwiyo
Handamar miyagu a amayo
Uwa ta tamke majanyin goyo
Kan jariri ya juyo
Ka da a bari ya lankwayo
A muskuta a sunkuyo
A hau sululun Saliyo
Tsiyataku
kullin kutu-kutu
Surutu rututu
An yi shigar burtu
Ana tsikari da tuntu
A duba wanga batu
Wasu na ta babatu
Da masu sambatu
Zobarar zunbutu
Ko wasu sun zautu
Talo-talo
Santolo
Mai fuka-fuki falo-falo
Yana taku salo-salo
Wuyansa kamar na zololo
Jan ragama
Ko juyayin rigima
’yan adawa na ta tsima
Suna ta hauma-hauma
Don rashin sanin makama
Akwai ’yan takara
Da masu taka-kara
kuri’unmu sufe safara
Don su haifar wa kasa asara
Su ke daukar nauyin suka-da-sara
Wai Baba kar ka tsaya
An gaji da sharar tsintsiya
Don ta share ’yan tsiya
Da suka jefa jama’a wuya
Miyagu na cusa kiyayya
Don su nunke mu a baibai
Su musanya Hauro a baibai
Sun kwashe matsabai
Zamanin da babu kwabbai
Zirga-zirgar ziryar zuwa Dubai
Baba ya taka musu burki
Ya ce a rage bariki
A yi aikin kirki
Masu sana’ar na-duke ga taki
Dami ya fi kayan jaki
Kun dauke ni hutsu
Halin aura ne tutsu
Fur shi ne tashin tsuntsu
In an ji ana mutsu- mutsu
Za a ji tsuwwa tsu-tsu
Sasarin sakarcin sakarai
Langabun lalurar Larai
Jiniyar jinjiniyar jarirai
Bilinbituwar birai
Loton laftun labarai
Dama-damar daurin dammai
Masu fafutikar neman mukamai
’Yan jagaliya an jawo makamai
Don lasar maskin maikon mai
Amma ba manufa takamaimai
Juriyar jarumi jarmai
Jimamin Jimmai
Ja-in-jar jama’a ai-ai
Aikin jinkai
Don kawar da kaikai
Kimiyyar sarrafa sinadarai
Kwaba magungunan Bokan Turai
dan magori mai tarairaya rai
Ruwan magani garai-garai
An ga amfaninsa sarai
Haurobiyawa ka da ai butulci
Mui wa Baba karamci
Yai mana fafutikar ’yanci
A cire wa al’umma sasarin kunci
Lallai ka da mui sokwanci
An fasko masu kirinki
Da ke hana aikin kirki
Suna sunna wa ’yan baranda sunki
Su banka wa jama’a buki
Da tutiyar kulle-kullen daki
Dagirgiri
Dogarawan dogari
Dundumin dumamar gari
Dungun dungurar garari
Dama-damar daurin danmari
Baban-burin-huriyya
kara kokarin gina Haurobiya
Ka kiyayi masu waskiya
Masu ta’adar danniya
Da suka kware a nuna wariya
Al’umma ta nuna juriya
A karkashin mulkin mai tsintsiya
’Yan zagon kasa na ta tsiya-tsiya
’Yan adawa na ta makircin kuliya
A hada karfi da karfe don kariya
A dabbaka kyawawan ta’adu
Sai kasarmu tai tsiran tudu
A shawo kan gada-gadar gudu
Kwashi-kwaraf inna rududu
Mu dabi’antu da awon mudu
Ni dai ina ba da sautu
Tagiyata na da tuntu
Ina masu buruntu
Kwaramniyarku ta fi surutu
Kun maishe da kowa sullutu
A fifita adala
Kan laluben dala
Don kauce wa masu dafdala
Masu aikin juhala
Fa’idar ka’ida na sa a daina lalala!
