Allah Ya yi wa tsohon Sakataren Gwamnatin Jihar Katsina, Alhaji Isah Katsina rasuwa.
Ya rasu a ranar Talata a asibiti sakamakon gajeriyar rashin lafiya yana da shekaru 81, kuma tuni aka yi jana’izarsa kamar yadda addinin musulunci ya tanada.
- Gwamnatin Tarayya ta shiga rikicin ’yan kwadago da El-Rufai
- Gwamnonin APC sun nemi El-Rufai ya sasanta da Kungiyar Kwadago
- Taron gwamnonin PDP bata lokaci ne —APC
- Hisbah ta kwace daruruwan kwalaben giya a Jigawa
An binne marigayi Isah Katsina a Makabartar Rimin Badawa, kuma ya rasu ya bar mata uku da ’ya’ya 14.
Gwamnan jihar Katsina, Aminu Bello Masari, Mataimakinsa, Mannir Yakubu da Shguaban Majalisar Jihar, Tasiu Musa Maigari na daga cikin wadanda suka halarci jana’izar.
Marigayi Isah Katsina yana daga cikin hazikan daliban Jami’ar Ahmadu Bello (ABU), da ke Zariya wanda suka kammala karatu a 1975.
Iyalansa sun shaida wa Aminiya cewa ya rike mukamin Sakataren Hukumar Ma’aikatan Gwamnatin Tarayya shiyyar Arewa ta tsakiya, sannan ya yi Shugaban Ma’aikatan Jihar Kaduna a zamanin mulkin Muhammad Lawan Kaita.
Ya rike mukamin Sakataren Gwamnatin Kaduna lokacin mulkin soji na Usman Mu’azu a 1984 sannan a daga 2000 zuwa 2003 ya rike mukamin a Jihar Katsina, karkashin mulkin marigayi Umaru Musa Yar’Adua.
