Mutum takwas tare da dabbobi da ba a iya tantance yawansu ba sun rasu bayan wata tirela makare da shanu ta bi ta kansu a Jihar Kwara.
Wannan al’amari ya faru ne bayan tirelar da ta fito daga Arewacin Najeriya dauke da shanu ta auka kan wata mota da ke tsaye a gefen titi.
- BIDIYO: Yadda Matan Kano Ke Gogayya Da Maza A Harkar Kwallon Kafa
- El-Rufai ya nemi a biya N500,000 kafin amfani da filin Idi
Kwamandan Hukumar Kiyaye Haddura ta Kasa (FRSC) a Jihar Kwara, Frederick Ogidan ya ce “Hatsarin ya ritsa da mutum 17 ne; takwas sun rasu wasu hudu kuma sun samu rauni.”
Wani shaida ya ce “Cikin mamatan har da masu sayar da dabbobi da sauran ’yan tireda da ke wurin; abin ya yi muni sosai.”
Ya bayyana cewa ana kyautata zaton wani mutum da ya rasu nan take a cikin motar shanun shi ne mai su.
Ya ce hatsarin ya auku ne a Mahadar Okoolowo, da ke Karamar Hukumar Ilorin ta Kudu a ranar Laraba da misalin karfe 6 na safe.
