Dakarun sojojin Nijeriya sun samu nasarar kashe kasurgumin ɗan fashin daji, Kachalla Halilu Sububu a safiyar Juma’a.
Kafin kisan nasa, Kachalla ya kasance ubangidan ɗaya daga cikin manyan ’yan ta’addan nan Bello Turji.
- Na rasa matata da ’ya’ya 5 a Ambaliyar Maiduguri —Goni
- Shigowar ’yan bindigar ƙasashen waje ta gigita Sakkwato
Mai magana da yawun shugaban ƙasa, Abdulaziz Abdulaziz ne ya bayyana haka a shafins na Facebook.
Sojojin dai sun samu nasarar kashe ƙasurgumin ɗan bindigar ne bayan ɗauki ba daɗi tsakaninsu da ’yan bindiga a tsakanin kwanar Dogon Ƙarfe zuwa Mayanki a ƙananan hukumomin Moriki da Anka da ke Zamfara.
Hadimin Shugaban Ƙasar ya ce, “wannan wata ƙarin nasara ce bayan kashe wasu jiga-jigan ɓarayin daji da aka yi a cikin shekara ɗaya da ta gabata.
“Waɗanda aka samu aikawa lahira a cikin wannan lokaci sun haɗa da Kachalla Ali Ƙawaje (ƙasurgumin ɗan ta’adda da ya taɓa harbo jirgin soja a Kaduna), Damina (mutumin da ya addabi yankin Ɗansadau), Moɗi-Moɗi, Ɓaleri (wanda ya sace ɗaliban Kaduna), Ɗangote, da sauransu.
