Sojojin Najeriya a ranar Asabar sun hallaka kasurgumin dan bindigar nan da ya addabi yankin Birnin Magaji na Jihar Zamfara, Alhaji Auta.
Kazalika, sojojin sun kuma hallaka mambobin da ke cikin gungunsa, yayin wasu hare-hare da suka kai ta sama, lokacin da ’yan bindigar ke tsaka da jimamin kisan nashi.
- An rufe coci mai shekara 220 saboda karancin masu ibada
- Boka ya sa an kona wani saboda ya gan shi da kan mutum biyu
An dai hallaka mambobin ne a sansaninsu da ke kauyen Jama’are Bayan Dutse da ke gundumar Nasarawa Mailayi.
Majiyoyi da dama sun tabbatar wa Aminiya labarin kisan na Alhaji Auta, ko da yake sun ce ba za a iya tabbatar da yawan mutanen da aka kashe ba.
Dan bindigar dai na daga cikin wadanda suka hana jama’ar yankin sakat.
