Wani gini mai hawa hudu da ake aikin ginawa, mallakin wani otal a yankin Babban Birnin Tarayya Abuja, ya rushe kuma ana fargabar ya danne kusan mutum 20 da ke cikinsa.
Otal din, mai suna Summit Villa dai na yankin Dape ne a unguwar Life Camp, ya rushe ne da yammacin Litinin.
- Bayan shafe shekara 320, an daina buga jarida mafi dadewa a duniya a kan takarda
- Tsadar Tumatir: An koma miya da yalo a Abuja
A cewar wani ganau a inda lamarin ya faru, otal din wanda kuma yake da ginin karkashin kasa, ana fargabar ya danne sama da mutum 20.
Sai dai ya zuwa lokacin hada wannan rahoton, wakilinmu ya ce an sami nasarar ceto tara daga cikin mutanen da ginin ya danne.
Tuni dai jami’an Hukumar Bayar da Agajin Gaggawa ta Kasa (NEMA), suka isa wurin inda suke dukufa aikin ceto mutanen da ke ciki.
Ya zuwa lokacin hada wannan rahoton dai, ba a samu rahoton samun asarar rai ba.
