Gwamnatin Jihar Neja, ta ce rashin tsaro ya hana ceto mutum 30 da suka maƙale a wata mahaƙar ma’adinai da ta rufta a Ƙaramar Hukumar Shiroro da ke Jihar Neja.
Shugaban hukumar bayar da agajin gaggawa na Jihar Neja, Abdullahi Baba Arah ya tabbatar da hakan ga manema labarai.
- Kungiyar Kwadago ta janye yajin aiki nan take
- Amarya ta yanke mazakutar angonta bayan wata hudu da aurensu
Ya ce har yanzu hukumar ba ta samu cikakkun bayanai kan adadin da aka ceto ba saboda rashin tsaro a yankin.
Babban daraktan, ya kuma ce hukumar ta samu rahoton yadda ’yan bindiga ke kai hare-hare a yankunan Shiroro da Mashegu a jihar.
Ya ce ’yan bindiga sun kai hari a kauyen Adogo Malam a ranar 2 ga watan Yuni, tare da yin awon gaba da mutum shida.
Ya kuma ce, ’yan bindiga sun yin garkuwa da sama da mutum 20 tare da sace shanu a yankin Tunga Kawo, wani yanki da ke maƙwabtaka da Erena.
Amma a cewarsa tuni suka tura jami’ansu ƙauyen Farin Doki, inda aka samu iftila’in, don ceto mutanen da ke birne a ƙarƙashin ramin.
Rahotanni sun ce gomman mutane ake tsammanin sun mutu, ko da yake hukumomi sun ce adadin yana iya zarta hakan.
Baba-Arah ya ce wajen haƙar ma’adinan ta rufa ne sakamakon mamakon ruwan sama kamar da bakin kwarya da aka yi a yankin.
Ya nuna damuwarsa kan yadda masu ceto suka tsere daga wajen sakamakon ci gaba da rufatawa da ramukan ke yi.
Amma ya ce an tura mutane masu aikin haƙar ma’adinai a yankin domin gudanar da aikin ceto.
