’Yan bindiga sun kai hari wani sansanin ’yan sanda a Jihar Katsina, inda suka kashe jami’ai huɗu da wasu mutum biyu.
Sun kai harin ne sanssnin ’yan sandan kwantar da tarzoma da ke Garagi, a Karamar Hukumar Kankara.
- Yadda ɗauke wutar lantarki ya gurgunta Arewa
- Gwamnonin PDP sun gana don warware matsalolin jam’iyyar
Mazauna garin sun ce maharan sun kashe jami’an tsaro huɗu tare da raunta mutum ɗaya.
Har wa yau, maharan sun yi awon gaba da bindigogin ’yan sanda.
Kazalika, sun kashe wasu mazauna garin guda biyu.
Wani mazaunin yankin da ya nemi a sakaya sunansa, ya ce maharan sun ƙone azuzuwan makarantar firamaren Tsamiyar Jino, inda jami’an tsaron suka kafa sansaninsu.
Ƙoƙarin jin ta bakin kakakin rundunar ’yan sandan jihar, ASP Abubakar Sadiq Aliyu, ya ci tura zuwa lokacin haɗa wannan rahoto.
