Kungiyar kwallon Kafa ta Bayern Munich da ke kasar Jamus ta dawo wasan Bundesliga da kafar dama inda takai ziyara kuma ta samu nasara akan kungiyar Union Berlin da ci 2-0 a ranar Lahadi.
Dan wasan gaba na kungiyar Robert Lewandowski ne ya fara jefa wa kungiyar ta Munich kwallo a minti 40 da fara wasan a bugun daga kai sai mai tsaron gida.
Ana saura minti 9 da kammala wasan ne mai tsaron baya na kungiyar Benjamin Pavard ya kara kwallo ta biyu wanda ya tabbatar wa kungiyar nasara a wasanta na farko bayan da aka dawo daga hutun coronavirus a kasar ta Jamus.
Kungiyar Bayern Munich zata ci gaba da kasancewa a kan teburin gasar da maki 58 a saman Burossia Dortmund mai maki 54.
A wasan da aka buga tun farko a yau dai an tashi canjaras tsakanin kungiyoyin Cologne da Mainz da ci 2-2.
