Muna murmushin murnar murmurewar makare-makaren makurar makarkarar murkushewar mulkin mallakar mulaka’u. Shekaru babban laujen manuniyar sama, inda aka samu fululun fahimtar dimbin al’umma a zugar zuga-zugin zamanin zamunna da dama-damar danne dama, wadanda suka yi ta fama wajen laluben makama. Kuma duk sa’adda wannan muhimiyar rana ta kewayo cikin kowace shekara sai Gwamnatin Haurobiya ta shirya ruguntsumin biki; a yi ta dagar dungun dumuiniyar dogewar dangi, ana ta kade-kaden karkada gangunan gangin gigi.
Su kuwa al’ummar kasa su yi ta kai-kawo wajen ce-ce-ku-ce safiya da maraice, wajen bibiyar irin bunkasar da aka samu yayin da jan ragama ta dawo hannun ’yan kasa. Shin kasaita ko kaskanta ake ta kukuta kaimi kamuya-muyar karkarewa?
A daukacin fadin Ifirikiyya ba kasurgumar kasaitacciyar kasa irin Haurobiya, wadda har lakabi ake yi mata da GINGIMEMIYAR GAGARUMAR GAFTARAR GUTSIRAR GARARUMAR GIWAR IFIRIKIYYA, wadda ta yi shuhura a wajen tattakin tunkahon tarayyar tarairayar tagomashin tarin taimakekeniya a tsakaninta da kasashen wannan nahiya, musamman a zamanin zubin zababbun zakakuran zaratan shirga- shirgan shahararrun shekarun shugabannin fafatawar fafutikar falle fasalin farin farawar farko, wadanda suka kwankwadi koko tare da talakawansu, har suka cimma nasarar tabbatar da doka da oda babu tada kan adda; jama’a kowa ya yi ta haramar harkokin hada-hada, ba tare da wata harkalla ba.
Yau kuwa, ga kasa dibge da tsilli-tsillin matsaloli da suka zame wa al’umma sasarin sarkakiyar sunkurun sargafe rayuwa. Tambayar da ta bijiro a nan, shin shugabannin farko muke tunawa ko kuwa dabaibayin da ke addabarmu muke yi wa ruguntsumin biki a farkon AKWAKUN-TOTON-BABA na kowace shekara?
Da shudewar sahun farin farawar jagororin jan ragamar al’ummar kasar nan, sai aka shiga walagigin watangaririyar wancakalar da kyawawan ta’adun tudun tada kan al’umma. Shin an baro shiri tun rani, ko kuwa ba a makara ba? Haurobiyawa ku bai wa kurungunku kyakkyawar makoma, wadda za ta yi zaman dirshan a kwanyar kwawalwarku, ko kun daina dawurwurin dumuiniyar darkakin dungun durkushewar duniya.
Wani hanzari ba rarewa a guje ba, a farfajiyar wannan makaranta, musamman a watan AKWATUN-BABBA na shekara ta dubu karamin lauje da sili da babban lauje, mun bijiro da yadda aka gudanar da bikin ’YANCI BABU ’YAN CICI, amma yau fa mun fasko yadda ’YAN CI-MU-CI ke ta jefa jama’a cikin kunci. Baranbaramar barusar buruntun babatun butu-butun bantalar buntun bakwainin batan-baka-tantan; zungurar zungurun zumbutun zababbakar zukun zakalkalewar zautattu, al’amarin da ya haifar da kaka-ni-ka-yin kasaitar kaimin kasurar kusumbin kasurgumar kasa, inda ake ta tsuwurwurta bikin bunkasar bukkokin biranen babakeren baragurbin mutanen kauyen kayau-kayau, tare da kwan-gaba kwan-bayan, wadanda suka kankane komai-da-komai kane-kane, alhalin sun bar ’yan kasa na ta gangamin gani-ganin gane-gane.
Tsawon zamunna dai tsarin Haurobiya ya kasance kashin shakushe, wato birgimar katoto a kan kankane-kanane, karami-karami. Don haka da zarar an falle shafukan mujallun mahangar makalutun makalun marubutan mujallun fanonin fahimta fululu, sai a yi ta tatar gasar kullu, a lulula luu!
Sai susanci sakankancewar sakarcin sasarin sihirin sihirtattun shagalar shargallen shantakewar shiga sheke-ayar shantu suka yi wasarairai, har kowane baragurbi ya samu farargar farmakin fagamniyar fangimar firgicin fancallen fancal-fancal din facakar facala, yayin da a tsakankanin nagargarun ninkayar nunin nauyayya niyar nakaltar nauyaye-nauyayen al’umma da gungun gagararrun gwankayen giringidimin gigiwar giwayen bata-garin bakwainin batattu ake fafutikar finciken fifita kissar kisisinar kassara kishiya.
Baya ga walwalin waliyon walankeluwar wa-ka-ci-ka-tashin wuccikewar wawar waskatattun Haurobiyawa, ai daman lakabin da ya fi dacewa da giwar Ifirikiyya, shi ne, KARIN KIMAR KASURAR KOLOLUWAR KASAITAR KAKKARFAR KATOTUWAR KASA, amma, kash! Nagargarun al’ummar Haurobiya na cike da takaicin wasu ’ya’yanta, wadanda suka zamo ’ya’yan kuka, har suka haifar da koke-koken kukan zubar da hawaye, yayin da duk gari ya waye, musamman in an yi la’akari da ta’azzarar tabargazar turka-turkar tafka ta’asar da suke tsuwurwurtawa. Kuma mafi yawan kasurguman ’yan fashi da makami da masu dabarbarun damun-furar damfarar dumfarar dogewar makircin mukeken mukami, su suka fi jawo wa uwarsu daurin damarar durin daddakowar daukakkiyar ashariyar ashararan assha-assha.
A nan, sai a fasko cewa, bikin bunkasar bukkokin biranen
babakeren baragurbin balbalin bala’in bobon bokokon mutane ya kaskantar da kauyuka kayau-kayau, ana ta
Kwan-gaba, kwan-baya kane-kane, inda ’yan kasa ke ta gane-gane, kodayake dai wasu na ta kwaramniyar kwarzanta kwarmaton biki:
Ayyiriri a hayye
’Ya’ya da iyaye
Dan na-goye na-goye
Har da ’yan tagwaye
Ana ta rangwadar juye-juye
A irin wannan yanayi ne, aminan abokan arziki da kawayen karajin kasurar kasaita ke afkawa da’irar kawanyar kuraye, su samu kurungunsu ko’ina a kewaye, har ta kai ga wasu na zubar da hawaye, tunda babu sukuni a birni da kauye.
Haurobiyawa, muna da zabi a tsakanin kasurar kusumbin kumbiya-biyar karantar kuntatar kaskancin kaskanta da kaimin kasaitar kimar karkarfar katotuwar kasa.
Mafitar masu mazayawar mamukar makama, ai sai a fifita aiki tukuru, har jikkunanmu su horu, ko mun samu hada karfi mu tattaru, don suturta asirinmu da suturu, ta yadda kasarmu za ta zamto ta gyaru. Kuma a dimbin wadannan shekaru, sai mu yi kokarin ganin mun karu, ka da mu kwaru, har mu samar da zakakuran zaratan zakaru, ko sun zame mana dangar dagar dogewar dakaru.
Bisa la’akari da bukukuwan bulkarar bijirarrun baragurbi, na yi roko da kira ka da mu bari mu makara, don haka a himmatu da gyara, har sai al’umma ta kwashi gara, ta yadda za a karke da zaman hira a dara, babu mai daga kokara, sai dai a rika yi wa juna kara.
Lallai muna da aiki gagarumi, amma ban da daukar makami ko taho-mu-gama da mai mukami, abin yi kawai, a kara kaimin watsattsake da alkalami a fafutikar kawar da ja-in-jar jelen jirgiyar jigatar jangwalar jimurdar jimami. Sannan a samar da hadakar hadin kai tare da masu aikin sa-kai, wadanda suka kiyayi masu shan-kai a fafutikar hawan dandamalin dakalin daidaiton daidaita daidai, ta yadda za a kauce wa faman inda-indar in’inar ai-ai!
Wannan kuwa zai tabbata ne da zarar Kadadar kudanci ta kauce wa kulafucin kululun kullin kila-wa-kalar kaikayin kiyayyar kabilanci, sannan Arewatawan Arewaci sun wancakalar da wautar wulakancin wuru-wurun wa-ka-ci-ka-tashin tumar tabarar tumasanci, har a daina shashanci, a yi komai cikin mutunci.
Shi ke nan, sai kishin kasarmu ya zamto namu, nakanmu, inda kowa zai samu makamar kamu, har a gasa tumu, kuma dawon gangariyar gyararren gyauron geronmu ya zamo curin damu.
