A wani yunkuri na kawar da jabun da gurbatattun wayoyin lantarki domin samar da ingantattu ga ’yan Najeriya, kamfanin wayoyin lantarki na Coleman Cables and wires ya bude wani daffo a Kaduna domin biyan bukatun masu neman wayoyin lantarki na kwara a yankin Arewa maso Yamma.
Manajan Darakta kuma Babban Jami’in Zartarwar Kamfanin, Mista George Onafowokan, wanda ya bayyana haka a tatttaunawa ta musamman da wakilinmu a shekaranjiya Laraba, ya ce daffon na Kaduna zai kasance yunkurin fadada kamfanin a sassan kasar nan.
Mista Onafowokan ya ce: “Burinmu mu kasance a ko’ina ba kawai a wani sashi na kasar nan ba. Kuma muna duba yiwuwar bude masana’antunmu a sassa daban-daban na kasar nan. Daffon na Kaduna shiri ne na farko a yankin Arewa. Kaduna za ta sa kamfanin ya zo kusa da yankin Arewa maso Yamma.”
Ya ce, zuwa kusa da abokin ciniki yana nufin samar da kayayyakin lantarkin a farashi mai rahusa tare da tabbatar da sun samu kayayyaki na kwarai. “Wannan zai kare su daga sayen jabu ko gurbatattun wayoyin lantarki a kasuwa,” inji shi.
Shugaban ya ce, jabu da gurbatattun wayoyin lantarki suna ci gaba da samun kasuwa ne, saboda babu ingantattun wayoyin lantarki nagari a kowane lungu da sakon kasar nan, lamarin da ya sa masu fasakauri ke wahalar da jama’a.
Mista Onafowokan ya ce: “Muna cike da farin ciki cewa kowa ya san wayoyin lantarkin da aka yi a Najeriya sun fi duk wadanda ake shigowa da su inganci. Gwamnati ta sani, suna cikin kamfe din ingancin kaya na NIS/SON da kamfanonin lantarki da SON suka kirkiro. Akwai cikakken inganci kuma wayoyin suna da cikakken inganci.
Kamfanin Coleman a wannan sana’a an san shi wajen kyakkyawan inganci da samar da kayayyaki, kuma wannan ne muke son isarwa ga jama’armu a sannan kasar nan.”
