Fitaccen jarumin fina-finan Amurka na Hollywood, Jason Statham, wanda ya ja ragamar fim din ‘the Transporter’ ya nuna goyon bayansa ga Falasdinawa a yayin da Isra’ila ke musu luguden bama-bamai a Zirin Gaza.
Jason Statham na shan yabo bayan bullar wani bidiyon a Twitter inda aka ga ya lullube daukacin marfin injin motarsa ta alfarma kirar GMC, da tutar kasar Falasindisu.
The Transporter bai tsaya nan ba, a cikin bidiyon dai an gan shi da kansa yana nada wa maduban gefen dankareriyar motar tasa mayafi da kyallen rawanin Falasdinawa.
A wani abu mai kama da fito-na-fito da mahaifarsa Birtaniya da kuma Amurka da yake rayuwa, bidiyon motar jarumin da ya taka rawa a fim din Furious 7 ya kuma fita unguwa da motar daga wani wuri mai dauke da tutar Amurka.
Wannan abu dai ya jawo masa yabo daga sassan duniya, saboda jarumtar da ake ganin ya yi a lokacin da Amurka da Birtaniya suke nuna goyon bayansu ga Isra’ila, wadda ta shafe makoni uku tana wa Falasdinawa ruwan bama-bamai a Zirin Gaza.
Sai dai duk da yabon da jarumun ke sha, ya zuwa wannan lokaci dai manyan kafofin yada labarai ba su rawaito lamarin ba.
