Akalla mutum 12 ne ajali ya katsewa hanzari ciki har da yara biyu sakamakon wani mummunan hatsarin mota da ya rutsa da su a Karamar Hukumar Tsafe ta Jihar Zamfara.
Lamarin, kamar yadda wani ganau ya shaida wa wakilinmu, ya ce ya faru ne da misalin ƙarfe 1:20 na rana a kan babbar hanyar Funtuwa zuwa Tsafe.
- Harin ’yan ta’adda ya yi ajalin mutum 16 a Yobe
- CBN ya musanta yunƙurin ƙirƙirar sabbin takardun Naira a baɗi
Wakilinmu ya ruwaito cewa, hatsarin ya rutsa da mutum 24 — 22 a cikin wata motar haya da wasu mutum biyu a wata A Kori Kura kirar Toyota.
Hatsarin wanda ya auku a sakamakon tsautsayi, bayanai sun ce an yi taho-mu-gama ne tsakanin motocin yayin da gudanarwar motar hayar ta kwace daga hannun direbanta.
Yanzu haka dai an kwantar da wadanda suka jikkata a Babban Asibitin Tsafe, inda suke karɓar magani.
Wani jami’in Hukumar Kiyaye Hadurra ta Kasa (FRSC) da ya bukaci a sakaya sunansa, ya alakanta aukuwar hatsarin da tukin ganganci.
“Ina cikin jami’an FRSC da suka kai dauki wurin da hatsarin ya faru wanda ya rusta da mutum 24 a duk motocin biyu.
“Wadanda suka mutu sun hada wasu mutum 10 da kananan yara biyu, yayin da kuma da dama suka jikkata,” a cewarsa.
