Akalla mutane 288 ne suka mutu yayin da fiye da 850 suka jikkata a wani mummunan hatsarin jirgin kasa da ya afku a kasar Indiya.
Alkalumma na hasashen shi ne hatsarin jirgin kasa mafi muni da kasar ta gani cikin sama da shekaru 20.
- Kano: Abba ya taka wa masu gine-gine a filin sansanin alhazai burki
- HOTUNA: Gwamnan Kano Abba ya yi rusau a Filin Sukuwa
Har ya zuwa wayewar garin Asabar masu aikin ceto da kokarin gano masu sauran nunfashi karkashin karagun jiragen kasa guda ukun da suka kife sakamakon hatsarin na Yammacin Juma’a.
Hotunan wurin da hatsarin ya afku sun nuna tarkacen karagun jiragen da kuma yadda jinni ke malala a yankin Balasore, na Jihar Odisha da ke Gabashin India.
Hadduran jiragen kasa dai ba sabon abu bane a kasar Indiya, mafi muni da kasar ta gani shine a shekarar 1981, lokacin da wani jirgin kasa ya kauce hanya tsallaka wata gada a Bihar ya fada cikin kogin, inda nan take mutane tsakanin 800 zuwa 1,000 suka mutu.
To sai dai an yi ammana da cewa hadarin na ranar Juma’a shi ne mafi muni tun daga shekarun 1990.
Babban Sakatare na Jihar Odisha Pradeep Jena ya tabbatar da cewa, kimanin mutane 850 ne suka jikkata kuma sun kwance a asibitoci sakamakon hadarin.
