Rundunar ’yan sandan Jihar Kano, ta bayyana cewa har kawo yanzu ba ta samu wani umarni na kamo mawaƙi Ado Gwanja ba.
Mai magana da yawun rundunar, SP Abdullahi Haruna Kiyawa ne ya bayyana hakan cikin wani saƙo da ya wallafa a shafinsa na Facebook.
A cewar saƙon da Kiyawa ya wallafa, “zuwa yanzu ba mu samu umarnin kotu na kamo Ado Gwanja ba.
“Da zarar an ba mu [umarni] za mu aiwatar,” in ji Kiyawa.
Ana iya tuna cewa, a ranar Litinin da ta gabata ce wata Babbar Kotu a Jihar Kano, karkashin jagorancin Mai Shari’a Aisha Mahmud, ta ba da umarnin kamo mawaƙi Ado Gwanja.
Bayanai sun ce kotun ta kuma haramta wa mawaƙin yin waƙa har zuwa lokacin da ’yan sanda za su kammala bincike a kansa.
Wannan dai na zuwa ne bayan da Majalisar Malamai ta Jihar Kano, ta maka mawaƙin a kotu kan amfani da kalaman da ba su dace ba a waƙoƙinsa.
