Gwamnatin Jihar Kano, ta kafa ɗakunan shan magani ga mahajjata a garin Makkah, da ke ƙasar Saudiyya.
Aminiya ta ruwaito cewa aƙalla mahajjata 3110 ne, daga jihar za su yi aikin hajjin bana a ƙasa mai tsarki.
- Saudiyya ta cafke maniyyata 300,000 marasa takardun aikin hajji
- Sallah: Ɗan majalisa ya raba raguna 3000 da 250m a Zamfara
Cibiyar, a cewar shugaban tawagar yaɗa labaran mahajjata Kano, Ibrahim Garba Shu’aibu, na da nufin ƙara bin tsarin Hukumar Alhazai ta ƙasa (NAHCON).
“Jami’an NAHCON sun ziyarci wajen kuma sun amince da cibiyar da ta fara aiki,” in ji shi.
Ya sanar da cewa Kano ce kaɗai jihar da NAHCON ta amince ta buɗe cibiyar lafiya ga maniyyanta a Makkah.
Maniyyatan za su shafe kwanaki a Makka suna gudanar da ibada da ta haɗa da ɗawafi a Ka’aba, da yin sallah a babban masallaci da kuma yin hadayar dabbobi.
Aikin Hajji na ɗaya daga cikin rukunnan Musulunci guda biyar kuma ya wajabta ga duk wani Musulmi da ke hankali, yake kuma da iko.
