Gungun gagararru
Gangaren gaftarar gutsirar garu
Fankamar fandararru
Fantsamar fitsararru
Karfa-karfan kadangaru
Sasarin sunkuru
Samamen sakarkaru
Sagaraftu sururu
Shammatar shanu shiru
Shisshigin shegantakar shekarun shahararru
Zirin zungurar zunguru
Zankaleliyar zangarniya zururu
Zaman-takewar zuru
Zalamar zakwadin zakaru
Jama’ar jamhuriyar jimamin jamhuru
Birane da kayuka
Batagari na ta tufka
Turmutsitsin jama’a ba masaka
An dai samu baraka
Ba wanda zai kishin kasarka
An dai bar kwafa
Wanzami bai son jarfa
Shagabannin sun sha’afa
Duwarwatsu suna ta jifa
Kudundunen hangame hancin shakar kirfa
Wasu na ta tsirfa
Matsala tun tana kan akaifa
Aka ki sa ruwa kura ta lafa
Mayafin musifu aka yafa
Har kowa ya fara takewa da kafa
Mun samu kanmu a kungurmin daji
Kowa na ta bangaji
Al’umma ta gaji
Kowa so yake akawo agaji
An dai fasko ramin maciji
Mafakar muggan magabta
Maboyar munafukai macuta
Makirai mabarnata
Mattatarar masu mugunta
Musun make-maken matalauta
Ruruta wutar rudani
Aika-aikar arangamar addini
Ana ta yawan zubar da jini
Sukar balatin kahon hauni
An bar jama’a cike da alhini
Zogin zaman zamani
Ga shi ana ta wuni-wuni
Bulkarar bambamin birni
Tsakatsakin tsinin tsanani
Tsoro tsororuwar tsauni
Zaman dirshan
Ai ta kishin-kishin
An haifar da asara da gangan
Miyagu sun tunkaro gadan-gadan
Sui sunkurun shan kan
Dannin danniya
Dangar dumuiniya
Juwa-juwar juriya
Kakarar karkarar karafkiya
Karyar karan kariya
Kayar kauyen kayau
Taga-tagar targade tarau
Karar karajin kure karyar karau
Motsin matso miyau
Gamon gajiyawar gajiyau
Rai kwakwai
Mutu kwakwai
Gunyar fashin kwai
Kusan komai da akwai
Al’amura ne bambarakwai
Jahilcin jahilai
Dolancin dolaye
Wautar wawancin wawaye
Ana ta abubuwa da maimai
Makomar masanan malamai
Mu sake dabara
Mu laluba mu gyara
Mu toshe kafar algarara
Mu yunkura
Mu hanzarta ka da a makara
Da tsohuwar zuma ake magani
Dadaddun ta’adu ake gani
Malumma masu sani
Kowa-da-kowa yai matsuguni
Al’umma a kyautata mazauni
Kawanyar kewaye-kewaye
Ta’adar gadon ’ya’ya da iyaye
Zamunnan farmakin mamaye
Katafariyar Katanga ce zagaye
Baraden fada na bi da bibiye
Tsarin tsaro
Tsare tsoro
Tururuwar taro
Tunkahon torokon toro
Tsiri-tsirin tsakanin tsiro
Gine-ginen ganuwa
Garuruwa na da garkuwa
Bako da bakuwa
Sai sun samu isuwa
Tada kan adda bai bazuwa
Zaman zumun zumunta
Mutuncin mutane masu mutunta
Baraden barden bajinta
Carar carkin cakwaikwaiwar cancanta
Dangar duga-dugin dattakun danganta
Cudeni in cudeka
Dagar dangin dinke baraka
Ba karya doka
Ba duka
Ballantana a koka
Kowace mashiga an mata kyaure
Masu shiga a ware
Miyagu a tare
Al’ummar da ba bare
Ko da bakon Baddakare
Da zuwan Bature
Kofofi aka sare
Ba wanda za a tare
Tun da an daina hare-hare
Dakarun sarauniya sun kare
Bayan ’yancin kai
Tattakin tumakan tunburkai
Da takun awakai
Ya haifar da sananin son kai
Aka karke da tutsun jakkai
Gantalin gari-gari
Giringidimin gigigiwa giriri
Ga garari
Watangaririya wuri-wuri
Banga-bangar bidirin biri
An san mai mukami
ko barden makami
da bakon wanzami
lamura na da masomi
don haka ba jimami
Babban mutum mai rawani
Da taimakon malami masani
Yake kula da birni
Duk ba wani bini-bini
Zamunnan iyaye da kakanni
Yau
A kwai kayoyi kayau-kayau
Ba bambacin muni da kyau
Magabtan mamugunta kyau-kyau
Dawurwurin dumuiniya darandakau
Rayuka bararraje
Al’amura a baje
Ana ta na jan-je
Samarin-kusu na bangaje-bangaje
Kurmusun ciki da waje
Talalar talaucin talaka
Wajijjigar wajigawar waraka
Langabun laftun laka
Runtsin raraka
Tsallen tsulan tsallaken tsukukun tsaka
Mu bi kadin ta’adar magabata
Mu yaukaka zumunta
Masu mulki a daina karanta
Mutane gari mu zam masu fahimta
Mu rungumi kyawawan ta’adu mu kwatanta
Cikinmu a samu zarata
Bin doka a aikata
Halaliya a halatta
Haramiya a haramta
Miyagu a hukunta
Tonon sililin wirkilili
Wulkitawar wawan wulli
Komai na da tushen asali
Dukiya da rayuka ba fatali
Sananne ne mai kansakali
Haurobiyawa
Garkuwar gagara kuwwa
Tsarin tsaron tsuwwa
Bar bilinbituwa
Ko kai-kawon kokowa
Gangar gurmin gunjin gangi
Gungunin gabagadin gigi
Mamungar majigin magagi
Juye-juyen jirkita jirgi
Karkarin kugin kawata kirgi
Dar-dar din dari-darin dirkaniya
Doridasonon doriya
Dauke-dauken dakin daukakkiya
Dokin dauko diya
Damarar daukar dawainiya
A kiyayi shaci-fadi
Wannan shi ag gargadi
Mu yasar da rudi
Mai toshe ganai da barbadi
Da jin dundumin rade-radi
Mugun macucin Tarba-tarba
Yayimar Magajin gari ai awon gaba
Huta-roro yai jibgin jibar jajiba
Satar mutane ya saba
Jihar Tumbin-giwa a kai gaba-da-gaba
Birnin Dabo
Ba a dabo
Musifu ne aka jajibo
Ruwan dafa kai aka debo
Kyawawan ta’adu a lalubo
Barankadamar Bararon-nono
Bobon bangajen bokokon bonono
Biranen burbudin baza barkono
Babbar magana dai sai da aka auno
Babban bogajin kwano
Dakin karar dakon dako
Bin kadin birnin Dikko
Basajen bokoko
Bankaurar hana kwankwadar koko
Laftun lafkewar lakar loko
Birnin lawurje
Babu bangaje-bangaje
Bilinbituwar barbaje
Burgujejen buje
Batun nadi da lauje
Masu martaba
Masu gidajen yaben makuba
Mutanenku na fama da ukuba
Mahangar mafita za a duba
Malumma a tama wa shugaba
Ai kokarin kawar da daba
Masu fuka-fukin tashi ’yan daba
Tarairaya da biyayya ’ya’yan Abba
A kiyayi gaba da giba
Sai al’umma tai galaba
Ina Magajin gari
Babban attajiri
Alaramma uban almajiri
A kula da uwar jinjiri
A kyauta karatun kumsar kuri
A daina kasala
A yaki juhala
A tabbatar da adala
A samu sa’idar lalala
Kowa ya samu walwala
Baraden burka bindiga
Ba bugi-in-buga
Ku ja tunga
Da dogewar daga
Ku ne gaggan gwanayen sabga
Jami’an asiri
A kara himmar kokari
Kui kundin bayanan sirri
Ban da jinkiri
Lallai ku zama masu jimiri
Sai birane sui kasurar kasaita
Karkara ta kambama a tarairayeta
Mazaunan unguwanni su kubuta
Daga zullumin zaman ragaita
’Yar burum-burum ai da zarata
Ginin gingimemiya
Ganuwar ganin giginya
Gane-ganen gogoriyon ganiya
Garambar gantalin Gambiya
Gungun gagararrun gangariya
Can a kasashen duniya
An yi bajintar nuniya
Da kwazon hana danniya
Mutane sun rage tankiya
Rabautar ribar romon ragon Romaniya
Binciki Barbados
Bar batun Bahamas
Ban san me a kai a Beralus
Ba bangon Berlin a Jamus
Bi-da-bin kalmomin kamus
A zo a bi doka
A bar zaluncin duka
Macuta a kama
Su gurfana gaban hukuma
Har a sha kan kiki-kaka
