Wata gada ta rushe a birnin Pittsburgh na Jihar Pennsylvania a Amurka ana daf da ziyarar da Shugaban Kasar, Joe Biden, ya shirya kaiwa birnin.
Bayanai sun ce lamarin ya faru ne gabanin ziyarar Shugaban, wacce dama makasudinta shi ne a kan gabatar da wani kuduri da ke neman a kai wa gine-gine a kasar daukin gaggawa.
Shugaba Biden dai ya sha nanata cewa galibi gine-ginen kasar, musamman na gidaje da hanyoyi sun tsufa matuka, kuma suna bukatar sabuntawa.
Rahotanni sun ce akalla mutum 10 ne suka samu raunuka a sanadin karyewar gadar, wacce kuma daga bisani ta yi sanadiyyar fashewar wata tukunyar gas a wajen.
Kakakin Fadar Shugaban Amurka ta White House, Jen Psaki , ta ce an sanar da Shugaba Biden batun karyewar gadar, kuma duk da haka zai kai ziyarar kamar yadda aka tsara.
A cikin wata sanarwa da ta fitar ranar Juma’a dai, Fadar ta White House ta ce, “Shugaban Kasa na godiya ga wadanda suka kai daukin gaggawa wajen a lokacin da lamarin ya faru.”
Shugaban Hukumar Kashe Gobara na birnin na Pittsburgh, Frick Park, ya ce ko a watan Satumban bara sai da injiniyoyi suka yi aikin duba lafiyar gadar.
