Tsohon Shugaban Kasa Goodluck Jonathan ya ce Hukumar EFCC mai yaki da masu yi wa tattalin arzikin kasar ta’annati ba ta taba gayyatarsa ba.
Jonathan na wannan furuci ne a matsayin musanta ikirarin da mawakin nan Femi Kuti ya yi a kansa, wanda ya ce Hukumar EFCC ta gayyace shi kan zargin sha’anin kudi bayan wa’adinsa ya kare a matsayin Mataimakin Gwamnan Jihar Bayelsa.
- Mahara sun kashe mutum 25 a makarantar kwana a Uganda
- Akwai gwamnonin da suka nemi wa’adin mulki na uku — Obasanjo
A baya-bayan nan mawakin ya ce tsohon shugaban Najeriya ya taba zuwa EFCC a matsayin wanda aka yi wa tambayoyi ko gudanar da bincike a kan shi, sai dai wata sanarwa da tsohon shugaban ya fitar ta musanta hakan.
A ranar Juma’a ne Wealth Dickson Ominabo wanda jami’in yada labarai ne a ofishin tsohon Shugaban Kasar ya fitar da sanarwar da ta karyata wannan ikirarin.
Ominabo ya ce ya yi amfani da wasu bayanai da wasu suka rika yada wa a baya kan shugaban domin su bata masa sunan, har suka rika cewa sai da ya je EFCC domin amsa tambayoyi.
