Dani Alves, dan wasan baya na kasar Brazil, ya sake komawa Barcelona bayan shekaru biyar da rabuwa da kungiyar.
A yammacin Juma’ar da ta gabata ce kungiyar kwallon kafa ta Barcelona ta sanar da cimma yarjejeniyar sake daukan dan wasan mai shekara 38 a kyauta.
Wata sanarwa da kungiyar ta wallafa a shafinta, ta siffanta Alves a matsayin dan wasan baya na gefen dama mafi kwarewa a tarihinta.
Sanarwar ta ce Alves zai fara daukar hora a Barcelona a mako mai zuwa amma ba zai iya buga wasa ba har sai watan Janairu.
A bayan nan ne kungiyar ta bayyana ra’ayin kin daukar dan wasan, amma sabon kocinta, Xavi Hernandez ya nuna sha’awar dawo da shi tawagar domin taimaka mata dawowa kan ganiya.
A watan Satumba aka dakatar da kwantiraginsa a kungiyar Sao Paulo sakamakon tababar da ta dabaibaye batun albashinsa.
Alkalumma na tarihi na cewa, Alves ya fi kowane dan wasan lashe gasa da kofuna iri-iri ciki har da manyan gasa 9 da ya lashe a Barcelona, Juvenstus da Paris St-Germain.
Alves wanda ya shafe shekara takwas a Barcelona daga shekarar 2008 zuwa 2016, ya lashe La Liga shida da Zakarun Turai uku da kuma Copa del Rey hudu da sauran kofuna da a jimulce sun kai kusan 23.
A shekarar 2008 ce Alves ya koma Barcelona karon farko daga Sevilla.
