Da yawa daga cikin magoya bayan kulob din Manchester United ba su san takamaiman dalilan da suka sanya kulob din ya yi waje rod da kocinsa Dabid Moyes a ranar Talatar da ta wuce ba. Don haka ne muka kalato wasu daga cikin dalilan kamar haka:
1. Ta tabbata kulob din Manchester United zai gama kakar wasa ta bana a gasar rukunin Premier na Ingila ne da maki mafi karanci a tarihin rayuwar kulob din.
2. Kulob din Manchester United ba zai halarci gasar cin kofin zakarun kulob-kulob na Turai a kakar wasa mai zuwa ba a karon farko tun bayan shekarar 1995 kimanin shekara 19 da suka gabata.
3. Wannan ita ce shekarar da kulob din Manchester United ya kasa tabuka abin-a-zo-a-gani tun shekaru goma da suka wuce.
4. An doke kulob din sau uku a jere a kakar wasa ta bana, kamar yadda ya taba faruwa da kulob din a shekarar 2001.
5. An fitar da kulob din a gasar cin kofin kalubale na Ingila (FA) a zagaye na uku. Haka ta taba faruwa ne da tsohon koci Aled Ferguson sau daya a tsawon zamansa a kulob din.
6. Wannan shi ne karon farko da kulob din Swansea ya samu nasara a kan na United a tarihin kulob din.
7. A karon farko rabon da kulob din Newcastle United ya doke na United tun a shekarar 1972
8. A karon farko rabon da kulob din West Brom ya doke United tun a shekarar 1978
9. A karon farko rabon da kulob din Stoke City ya doke United tun a shekarar 1984
10. A karon farko da aka jefa kwallo a ragar United a kasa da minti daya da fara wasa a gasar rukunin Premier na Ingila wacce Eden Dzeko na kulob din Manchester City na Ingila ya jefa a ragar United a kakar wasa ta bana.
11. A karon farko rabon da kulob din Manchester City da na Liberpool su samu nasara a kan na United gida da waje a tarihin gasar Premier ta Ingila.
12. A karon farko rabon da kulob din Eberton ya doke na United gida da waje tun a kakar wasa ta 1969 zuwa 1970.
13. A karon farko rabon da kulob din Eberton da na Liberpool su samu nasara a kan United gida da waje a gasar rukunin Premier sai a kakar wasa ta bana.
14. A karon farko da kulob uku Eberton da na Manchester City da kuma na Liberpool su samu nasara gida da waje a kan na United a tarihin gasar Premier na Ingila.
