Sunce sasarin sa-in-sa
Sauyin salon siyasa
Sassaucin saukaka susa
Sagaraftun sahalewar sassa
Kunzugun karanta korafi
Karafan karfa-karafan kofi
Kwanjin karfafa karfi
Kwazon karajin kazafi
Kulun-kulufiton kundumbalar karti
Matakin masu takawa
Mukaman masu rikawa
Matattakalar takun karawa
A kokarin inganta rayuwa
Goyon baya ana dada marawa
Jajircewar ’ya’yan Baba
Ba ma adawa balle gaba
Magabta sun dandani azaba
Bikin balaguron Baba
Mai-duka Yai mana ijaba
Usainin-Babajo
Ka hade da su Gwarjo
Daurin tsintsiya da Malamijo
A rika wasu Hajo
Mu kiyayi ’yan gwanjo
Dangwale dangwale
Kuri’u an daddale
Shari’a ba walle-walle
An san yawan na gidan Baballe
Shalelen Dammalele
Mu dai kada kuri’a
Daukacin masu shekarun zuri’a
A kauce wa takaddamar shari’a
Masu karatu a kara kira’a
Mutan gari mui ta fara’a
Murhun ta-mola Morinho
’Yan wasa ku taho
Mai horo zai muku kaho
Kudin da aka cusa a sanho
Sai an biya musu lanho
Malam Makaho
Ya ji batun taratsin tarho
Tsohuwa da tsoho
Sun ce wohoho
Na’ura tai tangardar tangaraho
A yasar da yarfe
A hada karfi da karfe
Mu lailaye kasa da shafe
Tafiya ta fi rarrafe
Sammakonmu ya zam da sassafe
Miyagu sun rude
Suna ta rade-rade
Har da gande-gande
Wasu na ta zunde
Na-mujiyar na-zomonmu bude
Masu mummunar manufa
Dabarbarunku na kan akaifa
Sai kun yi zufa
Mura ta sa shakar kirfa
Ana ta karfa-karfa
Umarnin zabe
Mu hadu a dabe
Kasa ce akai wa yabe
Mu daina rabe-rabe
A fito ban da labe-labe
Ina masu shagube
Lamurranku sun kwabe
Kuna ta tabe-tabe
Mugunta ta sa an tabe
Hawainiyar kulba ta kullube
A kada kuri’u a kebe
Tawagar magabta ce ta tube
Mikinsu ya rube
Fatarsu ta sabe
Sarkiya an kwakkwabe
Mui wa tufka hanci
Al’umma ta san ’yanci
Kowa ya ji ba kunci
A rika ganin juna da mutunci
Wannan ne azanci
Tuli-tulin tattali
Taku na hankali
Tarairayar tari tsilli-tsilli
Ma’adani na walwali
Makudai sun fi cikin cokali
Bugun lokaci tik-tik
Ayyuka ne birjik
Miyagu sun gaza cewa tak
An ce ka da mui sak
So ake kasa ta tsaya cak
Canke-canken cancanta
Cacar ce-ce-ku-cen cuta
Cabin cabalbalin cuwa-cuwa
Camamar cabawa
Carin cikon cinno wuta
Halaliya ta halatta
Haramiya ta haramta
Tantance tsakuwa da tsaba
Tsirin tsinkayen tsiren tukuba
Hattara kowa yai haba-haba
’Yan kwashi-kwaraf
Su sukai wa lalita karkaf
Suka wawushe komai kakaf
Ku dai ku shirya tsaf
Sun matso daf
Samarin-kusu
Wadanda suka bula asusu
Suka maishe da kowa sususu
Suka jigata al’umma busu-busu
Sun sa ana ta tafka musu
Bakar bikin kabusu
Kalmomin kamusu
Kalle-kallen kurmusu
Masinta sun iya su
An ga wallen rashin wayonsu
A firfito
Ai wa miyagu kwarmato
Muna da rahoto
Sun gwaguye masara har toto
Mui wa kawunanmu masalaha
Mahukunta a sa rayuwa tai arha
Sai mu ji dadin raha
Mu dara hahaha
Mu wataya a kowace jiha
Jama’a
Kar ai alwala da lam’a
Lazimtar mummunar dabi’a
Ke sa a karke da ba’a
Miyagu mu ce da su a’a
Fatanmu samun sa’a
Kasarmu tai ban sha’awa
A kakkabe mana ’yan wawa
Sunce sasarin sana’a
Gyara tangarahon samma’a
Sauyin kyautata halayya
Mui wa magabata biyayya
Magabta a tsafga musu tsimagiya
Shararmu da tsintsiya
Ba tsiwar tsiya-tsiya
Zumuntar zumun zaunawa
Ban da zaman-tattakewa
Kashin shakushen tunkudewa
Kyawawan ta’adun yadawa
Walwalar watayawa
Zababbakar zabuka
Zabi-zabi ka tika
Zazzabi ya tuka
Shugaba nagari ba shakka
Kason tsarewa ya zam an raka
Haurobiyawa mun fara tunkarar ZAZZABAKAR ZABUKA, inda daukacin ’ya’yan ZURI’A, wadanda suka kai gacin shekarun kada KURI’A za su tsiwurwurta zabi ka tika, tare da dangwale-dangwalen daddalewa a gidan BABALLE SHALELEN DAN MALELE. Abin da dai muke fata shi ne a yi FAFUTIKAR FAFE-BAURE, amma ban da BARE-BARE, mu dai tabbatar da cewa ’yancin al’umma duk mun KARE.
Babban batu dai wadansu na yada cewa wai kada ai SAK, tunda miyagu sun kasa cewa TAK, to a daidai bugawar agogo TIK-TIK, ko so suke yi kasa ta tsaya CAK?
’Yan makaranta masu koyon watsattsake da buda wagagen litattafai a farfajiyar Dodorido da ke cikin Amintacciyar jaridar kasar Haurobiya, wajibi ne ku yi fafutikar tabbatar da jan ragamar shugabanni nagargaru, don gudun kada a yi mana wa-ka-ci-ka-tashi, har mu ba je na-mujiya kuru-kuru. Sannan ku yasar da WAKILAN RAFKANUWAR RAFKE AL’UMMA, ku kuma wancakalar da SAMARIN samartakar kusu da ’yan matan jaba da gafiya, kannen SAURAYIN KIRINKI.
’Yan makaranta, wannan darasi dai takensa shi ne, “JI KA-KARU, idan ba haka ba, kuwa, JIKIN MUTUM YA HORU, yayin da ya sha hudar KAHO a wajen MURHUN TA-MOLA MORINHO, sai dai kawai tsohuwa da tsoho su yi ta cewa WOHOHOHO!
Lallai mu tabbatar da ganin wanzuwar zabubbuka cikin LULLUMIN LUMANA LULUM!
