Shugaban Kasa Muhammadu Buhari zai yi balaguro zuwa kasar Amurka a ranar Lahadi.
Hakan na kunshe ne cikin sanarwar da Babban Hadimin Shugaban Kasar kan Kafofin Sadarwar Zamani, Bashir Ahmad ya wallafa a shafinsa na Twitter a wannan Asabar din.
- Osinbajo zai wakilci Najeriya a jana’izar Sarauniya Elizabeth II
- Yadda dan China ya kashe ’yata a gidanmu —Mahaifiyar Ummita
Bashir Ahmad ya ce Buhari zai ziyarci Amurka ce domin halartar Babban Taron Majalisar Dinkin Duniya na shekara-shekara karo na 77 da za a gudanar a birnin New York.
Sanarwar ta ce shugaban zai gabatar da jawabi a ranar Laraba a taron da shugabannin kasashen duniya za su halarta.
Wannan na zuwa ne yayin da Mataimakin Shugaban Kasa, Farfesa Yemi Osinbajo ya tafi wakiltar Najeriya a jana’izar Sarauniya Elizabeth II da za a gudanar ranar Litinin a Birtaniya.
