Babbar bulala
Burgar busa badujala
Baza bezar benun balbela
Birgimar bambamin begila
Hakika cuta na da illa
Mai ciwo na zubar hawayen kwalla
Jikin jikkatar wahala
Gabbai na cikin sasarin talala
Don ba walwalar sakata a wala
Cututtuka na sa kasala
A shiga halin kila-wa-kala
Majinyata a halin ko’in-kula
Tabahuwar ta-molar tukin tuwon tula
Majinyaci bai rumurmutsar ’yar sala
Tunkarar tarin lala
Don yana haifar da lalala
Majinyata na ta wahala
Cuta ta shage kwala
Kuful-kuful majina na ta malala
Farfajiyar bokan Turai
Likitocin kwarai
Malaman jinya tarai-tarai
A tarairayi rai
Jajircewar jinyar jarirai
Barden bindiga
Bugi-in-buga
Bangaje banga-banga
Ba burga
Bambamin jan daga
Cuta ta ruga
Zazzabin zogin zuga
Farankama ta zaga
Amai zawo an tsuga
Basilar larura ta sa mamunga
Rigakafi
Rigar-kafi
Ruge-rugen ragon rafi
Rarrafen rankwafawar rufi
Ratattakar jikin mai korafi
Kunzugun kazanta
Kamuya-muyar karanta
Karfa-karfan kafafar karata
Kumbiya-kumbiyar kukuta
Karafan kundumbalar kankanta
Uwar jiki ta samu tabi
Gamagarin gabobi
An game su da kwabi
Ana ta maganin ciwon kwibi
A sasaba ai ta sabi
Baraden tsuntsayen sama
Ba su da dama
Gwaraza masu himma
Cuta su fyadeta sui jima
Jaruman jarma
Ina bakon dauro
Matukar ka duro
Lallai za ka sha kyauro
Basillar larura tai ma kwarkwaro
Lumanar uwar jiki tai awarwaro
Sangen sargafe sauro
Sunkurun sagarftun soro
Sasarin kwararo-kwararo
Sirrin tunkarar taro
Samamen garkamar horo
A dabbaka ikirari Haurubja
Na dubun karamin laujen sili
Wato aiki da hankali
Kar a debi kudi ai fatali
Kar na-mujiya yai kwajaja
An yi takaddamar tababar Haurubja
A dubun silin karamin lauje
Wato kada wa cuta jauje
A bangajeta ta baje
Babu na-jan-jen ja-in-ja
Kashi sili babban lauje
Ckin dari aka ce da Maisaje
Ya taimaka wa mai kauje
Da wanda ya kuje
Har wadanda suka daddauje
Sai a daina na-janje
Ko ai ta yi wa mutum jaje
Mahukunta ban da gwabje-gwabje
Farfajiyar Bokan Turai aka ce a je
To wa zai je
Danmagori
A sarrafa magungna nagari
Ingancinsu ya fito sarari
Kar a jefa jama’a garari
Jikon ruwa da kwayoyi curi
Tanadin tunkarar larura
Jinya sai da allura
Jami’ai ai ta lura
A dubi mai fama da mura
Har jiki ya sarara
A dai kafa tubali
Ginin gyaran hali
A yasar da karairayin kyalkyali
A datse ciwo da kansakali
Wannan shi ne rubutun wasali
A kyautata muhalli
Majinyaci mai hali
Ko marar hali
Su samu falalen fili
A tallafa ba feleken fi’ili
Farmakin fama
Samamen shammatar sammatsin sama
Baraden bindigar dagar dama
Janjamin jan takaddama
Tungar takun takama
Huwe
Hargitsin hawaye
’Ya’ya da iyaye
Abokai da kawaye
Ba masaniyar shirin Huwe
Talakawa a ba su kati
Rajistar shigar tanti
Na yanke cuta da balati
Na karkara a daina harbatta-mati
So ake ku samu sabati
Kowa ya gana da bakin Bature
Lalura duka a ture
Daga cuta akan murmure
A ci moriya a more
Ai tsallen badake a dire
Mutanen maraya
Farfajiyar Bokan-Turai ta tarayya
Shawarar warakar warwara a biya
A firfito ka da a buya
Mui gaba-gaba kar mui baya
Talaka ya samu gata
Na karkara da Belin-auta
Sai a daina wauta
Magani ne za a byar kyauta
Mamugunta kar ai sata
Tarayyar Ifirikiyya
Tai tattaunawar togaciya
Tarairayar tankiya
Tattalin tulin toliya
Torokon tumbudin tsiya
Damar daukar dawainiya
Danne damuwar danniya
Cakwaikwaiwar carin curiya
Kambama kakarin kariya
Birgimar bilinbituwar baudiya
Hakika na baje na-mujiya a farfajiyar bokan Turai ta zaratan zakakuran baraden bindigar samatsin samamen saman shawagin shammatar shamuwa, inda na yi arba da zakakuran zaratan jami’an kula da lullumin lumanar uwarjiki da jami’an jigata cutar da ta addabi majinyata, wadanda aka wadata su da dimbin na’urorin nunin nakaltar zogin zungurar zamani, don jin dadin sauke nauyayye-nauyayyen da suka ta’allaka da ayyukansu.
Tabbas cuta na da illa, domin masu faman ciwo kan zubar da hawaye har kwalla ta yi ta kwarara a jikin mai fama da wahala, tunda ai gabbobi na cikin sasarin talalar rashin walwala ballantana a sakata a wala.
Watakila, wannan dalilin ne ya sanya a kowace cibiyar ciccibar cin dunun danne dawurwurin dumuiniyar caccakar carin cututtukan lulawar laulayin uwarjiki ta baraden bingidar Haurobiya, wadda aka tanadi basillar babbar bulala burgar busa badujala ke da inganci, don kawar da balbalin bala’in badalar birgimar bankade badalar garkuwar gambun gararambar garnakakin gundumin gwarzon gwaraza. Kai in gajarce wannan batu na hango BASILLAR BINDIGAR BARADEN BIDIRIN BOKAN BATUREN TURAWAN TURAI, mai tattara turakun tarayyar tarairayar rai da malaman jinyar kwarai.
Idan har an yi wa masu yi wa kasa garkuwa katafariyar cibiyar cacume cututtuka, to gama-garin al’umma na da matukar bukatar kwatankwacin irin wadannan cibiyoyin, don kowa ya rabauta ka da a shiga ragaita, tunda sananen lamari ne cewa: Cututtuka na sa kasala, har a shiga halin kila-wa-kala, kuma a rika nuna wa maajinyata halin ko’in-kula, ga tabahuwa na tukin ta-molar tuwon tula, ga shi majinyaci ba ya iYA rumurmutsar ’yar sala. A irin wannan yanayi, ta yaya za a tunkari tarin lala mai haifar da lalala da matsananciyar wahala da ke sanyawa cuta ta shage wa mutum kwala, ya yi ta kuful-kuful majina na dalala?
Babu mafita sai ruge-rugen rugumniyar rarumar ragon rafi ko da yin rarrafen rankwafawar rufin ratattakar jikin mai korafi a lullube mutum da rigar-kafin rigakafin cututtuka masu bazuwar buzuzu buzu-buzu. Kuma a yunkura wajen ganin cewa kariyar kyautata karkara ba ta zamo kakarar kassara kararen Huwe na hauhawar hallarar hawaye. Kula da ingancin uwar jiki ko dai babu a hallarar HUWE ne?
Tarayyar Ifirikiyya ta taba tattaunawar togaciyar tarairayar tankiyar tattalin tulin taraliyar tulun tunkarar tumbudin tsiwar tsokacin tsiya-tsiya, don tsare-tsaren tsayuwar tsare gida, ta yadda cututtuka za su daina yi wa al’umma kaka-gida.
Tun cikin shekara ta dubu karamin lauje da sili aka yi gagarumin cincirindon kasashe masu ruwa da tsaki, karkashin Tarayyar Ifirikiyya, har ma da dandago-dago, inda aka bibiyi kadin yadda ake kula lullumin lumanar uwar jiki a birnin Haurubja
Cikin wata Afarinlilon shekara ta dubu karamin lauje da sili aka gudanar da wannan gagaraumin cincirindon, amma zuwa shekarar dubu karamin lauje da sili da manuniyar sama kasa guda ta cimma muradi, sannan kasashe karamin lauje da manuniyar sama sun kara kwazon kula da uwar jiki, yayin da rukunin kasashe sili da sili suka yi sako-sako da cin kasa kasa-kasa warwas.
Abin bin bahasi, shin ko Haurobiya na cikin jerin kasashen tarairayar tarayyar Ifirikiyya da suka kai ga gacin gajiyar alwashin da aka cimmawa wajen kula da lullumin lumanar uwarjiki? Tabbas tana ciki. Idan kuwa haka lamarin yake, lallai akwai bukatar a yi wa gama-garin Haurobiyawa katafariyar farfajiyar Bokan Turai ko da a kauyen kayau, wadda in an kwatanta kimar aikinta, ko a kasashen ketare iyakar agajin da za a iya bai wa majinyaci ke nan.
’Yan makaranta da daukacin masu falle shafukan sadarwa a Haurobiya, lallai mu himmatu ka’in da na’in wajen ganin Gwamnatin Haurobiya ta yunkura don cimma manufar ikrarin Haurubja na shekara ta dubu karamin lauje da sili, wajen aiki da hankali, don tarairayar uwar jikin mai hali da mara hali. Irin wannan namijin kokari zai iya kasancewa BELIN-AUTA ga al’ummar kasar nan. Kodayake Gwamnati ta wassafa tsarin tallafin inganta uwarjiki mazaunan karkara (a kundin watsattsaken warkoki), amma har yanzu dai abin sai dai a ce, ‘SHAGALIN SHARBAR SHAWARMAR SHIRWA SHIRU SHIRIM!
Haurobiyawa, a kara kwazon kyautata muhalli, ta yadda majinyaci mai hali ko marar hali za su wadatu da falalen filin tallafawa ba tare da fankamar fariyar feleken fi’ili ba.
